Ўзбекистонда аномал иссиқда ҳашар ўтказганлар жавобгарликка тортилади
Меҳнат инспекцияси аномал иссиқ об-ҳаво шароитида фуқаролар саломатлигини ҳимоя қилиш мақсадида жамоавий ишларни чеклаш бўйича огоҳлантириш билан чиқди.
Ўзбекистонда аномал иссиқда ҳашар ўтказганлар ва жамоавий ишларни ташкил этганлар жавобгарликка тортилади. Бу ҳақда Давлат меҳнат инспекцияси хабар берди.
Республика ҳудудида кузатилаётган аномал иссиқ об-ҳаво шароитида очиқ ҳавода узоқ вақт ишлаш иссиқ уриши, сувсизланиш, юрак-қон томир ва асаб тизими фаолиятининг бузилиши каби оғир оқибатларга олиб келиши мумкин.
Маълум қилиинишича, Ўзбекистон Республикаси Меҳнат кодексининг 359-моддаси ҳамда 0069-24-сонли санитария қоидалари ва нормаларига (СанҚваН) мувофиқ, йилнинг иссиқ даврида очиқ ҳудудларда ҳаво ҳарорати 36 даража ва ундан юқори бўлса, бундай шароит ўта хавфли (экстремал) меҳнат шароити ҳисобланади.
Шу муносабат билан, соат 10:00 дан 17:00 гача очиқ ҳудудларда ҳашарлар, оммавий меҳнат тадбирлари ва бошқа жамоавий ишларни ташкил этмаслик талаб этилди. Зарур ишларни имкон қадар эрталаб соат 10:00 гача ёки кечки соат 17:00 дан кейин бажариш тавсия қилинди.
Кечиктириб бўлмайдиган ишларни бажаришда эса меҳнат ва дам олишнинг махсус режимини жорий этиш, иш вақтини қисқартириш, ходимларни сояли дам олиш жойлари, ичимлик суви, шахсий ҳимоя воситалари ҳамда биринчи тиббий ёрдам воситалари билан таъминлаш зарурлиги қайд этилди.
Шунингдек, юқори ҳарорат шароитида ишлаётган ходимларнинг соғлиғи устидан доимий назорат ўрнатиш, аҳволи ёмонлашган тақдирда уларни зудлик билан ишдан озод қилиш ва зарур тиббий ёрдам кўрсатиш лозимлиги таъкидланди.
Давлат меҳнат инспекцияси меҳнатни муҳофаза қилиш тўғрисидаги қонунчилик талабларини бузиш ҳамда ходимлар ҳаёти ва соғлиғига хавф туғдирувчи меҳнат шароитларини яратиш қонунчиликда белгиланган тартибда жавобгарликка сабаб бўлишини эслатди.
