Янгиланган FIFА рейтингида Ўзбекистон МТЖ 10 поғонага пастлади

FIFA терма жамоаларнинг навбатдаги рейтингини эълон қилди. Янгиланган рўйхатда Ўзбекистон миллий терма жамоаси 10 поғона пастлаб, 60-ўриндан жой олди. Фабио Каннаваро бошқарувидаги жамоа ҳисобида айни пайтда 1409,73 рейтинг очкоси мавжуд.

 

Ўзбекистон сўнгги янгиланишда 23,11 очко йўқотган. Бунга терма жамоанинг 2026 йилги FIFA Жаҳон чемпионатидаги муваффақиятсиз иштироки асосий сабаб бўлди. "Оқ бўрилар" гуруҳ босқичида Колумбияга 1:3, Португалияга 0:5 ва Конго ДРга 1:3 ҳисобларида мағлуб бўлиб, мусобақани ғалабасиз якунлади. Шунингдек, Канада ва Нидерландияга қарши ўртоқлик учрашувларидаги мағлубиятлар ҳам рейтингдаги пасайишга таъсир кўрсатди.

 

Осиё жамоалари орасида Япония 17-ўрин билан етакчиликни сақлаб қолди. Кейинги ўринларни Эрон (22), Австралия (28) ва Жанубий Корея (32) эгаллаган. Ўзбекистон 60-ўрин билан қитъа рейтингида еттинчи бўлиб турибди. Саудия Арабистони (58) ва Қатар (59) Ўзбекистондан юқорида жойлашган бўлса, Ироқ (63), БАА (68) ҳамда Иордания (73) ундан кейинги ўринларни банд этган.

 

Жаҳон чемпионатида ғолиб бўлган Испания 30,27 очко жамғариб, 1995,88 очко билан FIFA рейтингида биринчи ўринга кўтарилди. Аввалги пешқадам Аргентина иккинчи, Франция учинчи, Англия тўртинчи ва Бразилия бешинчи ўринни эгаллади.

 

Янгиланган рейтингнинг кучли ўн бешлигига, шунингдек, Марокаш, Португалия, Белгия, Нидерландия, Мексика, Колумбия, Германия, Хорватия, Швейсария ва Италия ҳам кирди.

 

FIFА маълумотига кўра, Норвегия 12 поғонага кўтарилиб, рейтингдаги энг катта ўсишни қайд этди. Тунис эса 12 поғона пастлаб, энг катта пасайишни бошдан кечирди. Рейтинг очколари бўйича Испания энг катта (+121,17) ўсишга эришган бўлса, Панама энг кўп (-60,74) очко йўқотган терма жамоа бўлди.