Лионел Месси Аргентина терма жамоасидаги фаолиятини якунлаши мумкин

Жаҳон чемпионати–2026 финалида Испанияга мағлуб бўлган Аргентина терма жамоаси сардори Лионел Месси терма жамоадаги фаолиятини якунлаши мумкин. Бу ҳақда аргентиналик журналист Эрнан Кастилиога таяниб Goal хабар берди.

 

Унинг маълум қилишича, 39 ёшли футболчи финалдан кейин кийим алмаштириш хонасида жамоадошларига Испанияга қарши ўйин Аргентина миллий жамоаси сафидаги сўнгги баҳси бўлганини айтган.

 

Бироқ бу маълумот ҳозирча расман тасдиқланган эмас. Мессининг ўзи ҳам миллий жамоадаги фаолиятини якунлаётгани ҳақида ҳеч қандай баёнот бермаган.

 

TyC Sports нашри эса бу хабарга эҳтиёткорлик билан ёндашиш кераклигини ёзди. Нашр маълумотига кўра, Месси Жаҳон чемпионати бошланишидан аввал халқаро фаолияти бўйича якуний қарор қабул қилмаган ва яқинларига ҳам бундай режаси ҳақида айтмаган.

 

Финалдан кейин Месси ижтимоий тармоқларда мухлисларга мурожаат қилиб, жамоани қўллаб-қувватлаган барчага миннатдорлик билдирди. Шунингдек, у Аргентина кетма-кет иккинчи марта Жаҳон чемпионати финалига чиққанини катта ютуқ сифатида баҳолаб, Испания терма жамоасини чемпионлик билан табриклади.

 

2026 йилги Жаҳон чемпионатида Лионел Месси 8 та учрашувда иштирок этиб, 8 та гол урди ва 4 та голли узатмани амалга оширди.

 

Эслатиб ўтамиз, Месси 2016 йилги Америка кубоги финалидаги мағлубиятдан кейин ҳам Аргентина терма жамоасидан кетишини эълон қилган эди. Аммо бир неча ой ўтиб қарорини ўзгартириб, миллий жамоага қайтди. Кейинчалик у Аргентина билан 2021 ва 2024 йилги Америка кубоги ҳамда 2022 йилги Жаҳон чемпионатида ғолибликни қўлга киритди.