ОАВда фаолият юритаётган хотин-қизлар учун “Атиргул – 2026” танлови эълон қилинди

Ўзбекистон Журналистлар уюшмаси Оила ва хотин-қизлар қўмитаси билан ҳамкорликда Ўзбекистон Республикаси Мустақиллигининг 35 йиллиги муносабати билан оммавий ахборот воситаларида фаолият юритаётган хотин-қизлар ўртасида “Атиргул – 2026” республика кўрик-танловини эълон қилди.

 

Танлов хотин-қизларнинг ижтимоий-сиёсий фаоллигини ошириш, оила институтини мустаҳкамлаш, миллий қадриятлар ва маънавий меросни тарғиб қилиш, шунингдек, хотин-қизларга нисбатан тазйиқ ва зўравонликнинг олдини олиш мақсадида ташкил этилмоқда.

 

Шунингдек, танлов “Янги Ўзбекистон – 2030” стратегияси, давлат дастурлари ҳамда миллий тараққиёт концепцияларига мувофиқ равишда ОАВда фаолият юритаётган хотин-қиз журналистларни рағбатлантириш ва уларнинг ютуқларини эътироф этишга қаратилган.

 

Кўрик-танлов 12 та номинация бўйича ўтказилади:

 

1. Энг яхши телевизион журналистик материал

   (телетасвир, телерепортаж, интервью, махсус кўрсатув)

 

2. Энг яхши радио журналистик материал

   (радиоэшиттириш, интервью, муаллифлик дастури)

 

3. Энг яхши босма ОАВ материали

   (мақола, очерк, таҳлилий материал, интервью)

 

4. Энг яхши интернет журналистика материали

   (онлайн мақола, мультимедиа лойиҳаси, веб-журналистика)

 

5. Энг яхши ижтимоий тармоқ лойиҳаси

   (Телеграм, YouTube, Facebook, Instagram платформаларидаги ижодий лойиҳалар)

 

6. Энг яхши суриштирув журналистикаси

   (ижтимоий муаммоларга бағишланган таҳлилий суриштирув)

 

7. Энг яхши фотожурналистика иши

   (фоторепортаж, ижтимоий фотоочерк)

 

8. Энг яхши ҳужжатли фильм ёки махсус медиалойиҳа

 

9. Энг яхши ёш журналист

   (30 ёшгача бўлган журналистлар учун)

 

10. Энг яхши ҳудудий журналистик материал

 

11. Жамоатчилик эътирофи мукофоти

 

12. Ҳакамлар ҳайъатининг махсус мукофоти

 

Танловга номзодлар Ўзбекистон Журналистлар уюшмасининг ҳудудий бўлимлари, Уюшма қошидаги Ижодий кенгашлар, Оила ва хотин-қизлар қўмитаси томонидан тавсия этилади.

 

Танловга номзодлар бўйича тавсияномалар 2026 йилнинг 20 июлидан 2026 йилнинг 20 августигача қабул қилинади.

 

Номзодларнинг ҳужжатларини кўриб чиқиш ва танлов ғолибларини эълон қилиш бўйича якуний хулосавий қарор танлов Ҳакамлар ҳайъати томонидан қабул қилинади.

 

Танлов ғолиблари Ўзбекистон Республикаси давлат мустақиллигининг 35 йиллиги арафасида эълон қилинади ва махсус диплом, эсдалик статуэткаси ҳамда пул мукофоти билан тақдирланади.