Тадбиркорлар учун жарималар ва тўловлар камайтирилиши мумкин
Президент Шавкат Мирзиёев назорат қилувчи органларга тадбиркорларга камчиликларни бартараф этишга кўмаклашиш зарурлигини таъкидлаб, жарималар, тўловлар ва йиғимларни қисқартириш бўйича топшириқ берди.
Ўзбекистондаги 51 та вазирлик ва идора 322 та йўналиш бўйича молиявий жарима қўллаш ваколатига эга. 2024–2026 йилларда ушбу ваколатлар доирасида қарийб 3 триллион сўмлик жарима қўлланган. Бу ҳақда 21 июль куни Президент Шавкат Мирзиёев раислигида ўтказилган видеоселектор йиғилишида маълум қилинди.
Йиғилишда давлат раҳбари назорат ва жазо қўлловчи ташкилотлар раҳбарларининг ёндашуви ўзгариши зарурлигини таъкидлади. Унинг сўзларига кўра, тадбиркорни жазолашдан аввал унга камчиликларни бартараф этиш имконияти берилиши ва тўғри йўл кўрсатилиши керак.
Шунингдек, ташқи бозорларда рақобат кучайиб бораётган бир пайтда ишлаб чиқарувчилар ва экспортчилар зиммасидаги тўлов ҳамда йиғимларни камайтириш масаласи ҳам муҳокама қилинди.
Қайд этилишича, бир фура гилосни экспорт қилишда божхона йиғими, фумигация, сертификатлаштириш ва декларант хизматлари учун 5 миллион сўмгача қўшимча харажат юзага келмоқда.
Йиғилиш якунида барча вазирлар ва тармоқ раҳбарларига бир ҳафта муддатда ўз тизимларидаги бюрократик тартиб-таомилларни, жарималар, тўловлар ва йиғимларни кескин қисқартириш ҳамда бизнес муҳитини яхшилаш бўйича таклифларни Президент администрациясига киритиш топширилди.
