Тошкентдаги “Мовий гумбазлар” кафеси дастлабки қиёфасига қайтарилади
Маданий мерос агентлиги биринчи ўринбосари “Мовий гумбазлар” кафеси муаллифи — таниқли меъмор Вил Муратов билан биргаликда маданий мерос объектини кўздан кечирди.
Тошкентдаги “Мовий гумбазлар” (Голубие купола) кафеси илмий тадқиқотлар ва халқаро реставрация тамойиллари асосида тўлиқ реставрация қилиниб, унинг дастлабки меъморий қиёфаси тикланади.
Маданий мерос агентлиги маълум қилишича, агентлик директорининг биринчи ўринбосари Элмурод Нажимов таниқли меъмор, мазкур объект муаллифи Вил Муратов билан биргаликда “Мовий гумбазлар”ни кўздан кечирди.
1968–1970 йилларда бунёд этилган “Мовий гумбазлар” Тошкентдаги модернизм меъморчилигининг ноёб намуналаридан бири бўлиб, 2019 йилда Вазирлар Маҳкамаси қарори билан кўчмас моддий маданий мерос объектларининг Миллий рўйхатига киритилган.
Қайд этилишича, кейинги йилларда амалга оширилган таъмирлаш ишлари давомида объектнинг мозаик безаклари ўзгартирилган ва бу унинг асл меъморий-бадиий қиёфасига салбий таъсир кўрсатган. Шу сабабли Вил Муратов иштирокида иншоотнинг дастлабки кўринишини илмий ўрганиш ва қайта тиклаш ишлари бошланди.
Лойиҳани амалга ошириш учун халқаро ва маҳаллий мутахассислардан иборат махсус ишчи гуруҳ тузилади. Унинг таркибига модернизм меъморчилиги бўйича экспертлар, меъморлар, санъатшунослар ва реставрация мутахассислари, жумладан Екатерина Головатюк, Борис Чухович ҳамда Фотима Абдураҳмонова жалб этилади. Мутахассислар объектнинг тарихий, меъморий ва бадиий қимматини сақлаб қолиш, унинг дастлабки элементларини илмий асосда қайта тиклаш бўйича ечимлар ишлаб чиқади.
Маданий мерос агентлиги ушбу лойиҳа нафақат алоҳида тарихий бинони қайта тиклаш, балки Ўзбекистоннинг XX аср меъморий асраш, ўрганиш ва халқаро миқёсда тарғиб этиш йўлидаги муҳим қадам бўлишини таъкидлади.
