Трамп Канаданинг айрим маҳсулотларига 50 фоизлик бож жорий қилди
Канада бош вазири бу қарорни АҚШ–Канада–Мексика эркин савдо келишувига зид деб баҳолади.
АҚШ президенти Доналд Трамп Канада импортининг қарийб 20 миллиард долларлик қисмига 50 фоизлик бож жорий этиш ҳақидаги фармонни имзолади. Оқ уй бу қарорни Канада томонидан АҚШ маҳсулотларига нисбатан қўлланаётган савдо чекловлари билан изоҳлади. Бу ҳақда BBС хабар берди.
Янги тарифлар вино, мебель, спорт анжомлари ва бошқа қатор маҳсулотларни қамраб олади. Бироқ энергетика маҳсулотлари, калий ўғитлари, балиқ маҳсулотлари ҳамда муҳим фойдали қазилмалар ушбу божлар рўйхатига киритилмаган.
Канада бош вазири Марк Карни Трамп қарорини АҚШ–Канада–Мексика эркин савдо келишувига зид деб баҳолади. У ҳукумат Канада ишчилари ва корхоналарини ҳимоя қилишини ҳамда АҚШ билан савдо музокараларини янада жадаллаштиришини билдирди.
Карни, шунингдек, зарурат туғилганда Канада жавоб чораларини кўриши мумкинлигини таъкидлаган. Томонларга янги тарифлар кучга киришидан олдин музокаралар олиб бориш учун 30 кунлик муддат берилган.
Мутахассислар янги божлар Шимолий Америкадаги савдо муносабатларини янада кескинлаштириши, айрим маҳсулотлар нархининг ошишига ва икки давлат ўртасидаги иқтисодий зиддиятларнинг кучайишига олиб келиши мумкинлигини таъкидламоқда.
