Европадаги жазирама дон бозорига 2 миллиард евродан ортиқ зарар етказди
Июнь ойида Европада кузатилган аномал иссиқ оқибатида қарийб 9 миллион тонна дон ҳосили йўқотилди.
Европада июнь ойида кузатилган аномал жазирама дон ҳосилига жиддий зарар етказди. Financial Times нашрининг Европа қишлоқ хўжалиги бозори иштирокчилари манфаатларини ҳимоя қилувчи Coceral ассоциацияси ҳамда иқлим ўзгариши масалалари билан шуғулланувчи ECIU таҳлил маркази маълумотларига таяниб хабар беришича, қарийб 9 миллион тонна дон ҳосили йўқотилган.
Нашр қайд этишича, бунинг оқибатида Европа Иттифоқи ва Буюк Британияда дон ҳосили бўйича прогнозлар сезиларли даражада пасайтирилган. Етказилган иқтисодий зарар 2 миллиард евродан ошган.
Энг катта йўқотиш Францияда қайд этилган. Мамлакатда дон ҳосили прогнози 4,1 миллион тоннага қисқартирилган бўлиб, бу қарийб 891 миллион евро зарар сифатида баҳоланмоқда. Энг кўп зарар кўрган иккинчи давлат Венгрия бўлиб, у ерда ҳосил йўқотишлари 2,4 миллион тоннани ташкил этган.
Франциялик фермерларнинг маълум қилишича, айрим экинлар, хусусан, соя ҳосили 50–70 фоизгача камайиши кутилмоқда.
“Биз фалокат томон кетаётганимиз йўқ, биз аллақачон унинг ичидамиз”, — деди Франциянинг шарқидаги органик фермер хўжалиги эгаси Бенуа Мерло.
Таҳлилчиларга кўра, чорвачилик учун асосий озуқа ҳисобланган маккажўхори ҳосилининг қисқариши Бразилия ва Украина каби давлатлардан импорт ҳажмининг ошишига олиб келиши мумкин.
Шунингдек, Францияда буғдой ҳосилининг камайиши ушбу мамлакатнинг Африка давлатларига буғдой экспорти қисқаришига сабаб бўлиши кутилмоқда.
