Трамп Жанни Инфантинони БМТ Бош котиби лавозимига тавсия қилмоқчи
АҚШ президенти ФИФА раҳбарини дунё миқёсида ҳурматга сазовор ва халқларни бирлаштира оладиган етакчи сифатида баҳоламоқда.
АҚШ президенти Доналд Трамп FIFА президенти Жанни Инфантинони БМТнинг навбатдаги Бош котиби лавозимига илгари суришни режалаштирмоқда. Бу ҳақда The New York Post (NYP) ўз манбаларига таяниб хабар берди.
Нашр маълумотига кўра, Трамп Жанни Инфантинони дунё миқёсида ҳурмат қозонган ва турли мамлакатлар ҳамда халқларни бирлаштириш қобилиятига эга шахс сифатида баҳоламоқда.
Қайд этилишича, Трамп ва Инфантино 2026 йилги футбол бўйича Жаҳон чемпионати давомида янада яқин ҳамкорлик қилган.
Шу билан бирга, нашр Трампнинг эҳтимолий ташаббуси БМТдаги географик ротация тамойилига мос келмаслигини эслатган. Амалдаги қоидаларга кўра, навбатдаги Бош котиб Лотин Америкаси ёки Кариб ҳавзаси давлатларидан номзод бўлиши кутилмоқда. Бироқ, The New York Post манбаларига кўра, бу ҳолат Инфантино номзоди учун ҳал қилувчи тўсиқ бўлмаслиги мумкин.
Трампнинг глобал ҳамкорлик бўйича махсус элчиси ва Доминикан Республикасининг БМТдаги собиқ элчиси Паоло Замполли нашрга берган изоҳида Жанни Инфантинонинг халқаро тажрибаси ва музокара олиб бориш салоҳияти БМТ раҳбари лавозимида самарали фаолият юритишига хизмат қилишини таъкидлаган.
Маълумотларга кўра, БМТ Бош котиби сайловлари жорий йилнинг декабрь ойида ўтказилиши режалаштирилган. Ҳозирда ушбу лавозим учун бир неча номзод, жумладан Чилининг собиқ президенти Мишел Бачелет ҳамда МАГАТE бош директори Рафаэл Гросси номзоди тилга олинмоқда.
