Ал-Ақсо масжидига 4 мингдан ортиқ исроиллик бостириб кирди

Фаластиннинг Қуддус губернаторлиги маълумотига кўра, 23 июль куни босиб олинган Шарқий Қуддусдаги Ал-Ақсо масжиди мажмуасига 4 288 нафар исроиллик кўчманчи ва ўта ўнг қанот гуруҳлари аъзолари кирган. Кун якунига қадар уларнинг сони 5 минг нафарга етиши мумкинлиги қайд этилган. Бу ҳақда Al Jazeera хабар берди.

 

Улар орасида Исроил миллий хавфсизлик вазири Итамар Бен-Гвир ҳам бўлиб, у ҳудудга кучайтирилган полиция қўриқлови остида кирган. Ташриф яҳудийларнинг Тиша БЪАв мотам куни муносабати билан амалга оширилган.

 

Фаластин расмийлари Исроил хавфсизлик кучлари Ал-Ақсо мажмуаси дарвозаларида қатъий чекловлар жорий этгани, кўплаб фаластинлик ибодатчилар ва талабаларни ҳудудга киритмагани ҳамда айримларга нисбатан куч ишлатганини билдирди.

 

Қуддус губернаторлиги маълумотига кўра, мажмуа ичида айрим исроилликлар Талмуд маросимларини ўтказиб, сажда қилган, қўшиқ куйлаган ва ибодат қилган. Исроил ОАВ эса полиция минг нафардан ортиқ яҳудийга ҳудудда ибодат қилишга рухсат берганини ёзди.

 

1967 йилда ўрнатилган статус-квога мувофиқ, мусулмон бўлмаганларга Ал-Ақсо мажмуасига ташриф буюришга рухсат берилади, бироқ у ерда ибодат қилиш тақиқланади.

 

Бен-Гвир Тиша БЪАв муносабати билан қилган ташрифи чоғида яҳудийлар ушбу ҳудудда ўзларини "эгаларидек ҳис қилаётгани"ни айтиб, бу борадаги вазиятни "катта ютуқ" деб баҳолади.

 

Фаластин президенти маъмурияти ва Ташқи ишлар вазирлиги бу ҳаракатларни халқаро ҳуқуқнинг бузилиши ҳамда Ал-Ақсо мажмуасининг тарихий ва ҳуқуқий мақомини ўзгартиришга қаратилган хавфли кескинлашув сифатида баҳолади.

 

ҲАМАС ҳаракати ҳам рейдларни қоралаб, бундай ҳаракатлар оқибатсиз қолмаслигини билдирди. Иордания Ташқи ишлар вазирлиги эса Бен-Гвирнинг ташрифини "масжид муқаддаслигининг таҳқирланиши, кескинлашув ва қабул қилиб бўлмайдиган провокация" деб атаб, халқаро ҳамжамиятни Исроилга босим ўтказишга чақирди.