Ҳиндистондаги сув тошқинлари оқибатида 40 дан ортиқ одам ҳалок бўлди
Табиий офатдан 1800 дан ортиқ қишлоқдаги 900 мингга яқин аҳоли жабр кўрган.
Ҳиндистоннинг шимоли-шарқидаги Ассам штатида июнь ойидан буён давом этаётган муссон ёмғирлари оқибатида юзага келган сув тошқинлари камида 41 кишининг ҳаётига зомин бўлди. Бу ҳақда штат бош вазири Ҳиманта Бисва Сармага таяниб, Arab News хабар берди.
Унинг сўзларига кўра, сув тошқинлари оқибатида минглаб чорва моллари нобуд бўлган. Юқори оқим ҳудудларида кузатилган жала ёғинлари ҳамда айрим жойларда меъёрдан 436 фоизга кўп ёққан ёмғир қатор қишлоқларда мисли кўрилмаган талафотларни келтириб чиқарган.
Расмий маълумотларга кўра, сув тошқинлари 1 800 дан ортиқ қишлоқдаги қарийб 900 минг аҳолига таъсир кўрсатган. Штат бўйлаб 150 га яқин вақтинчалик бошпана ташкил этилиб, уларда 30 мингга яқин киши жойлаштирилган.
Қидирув-қутқарув ишларига Ҳиндистон ҳарбий-ҳаво кучлари, штат ва миллий фавқулодда вазиятларга жавоб бериш хизматлари жалб этилган. Ёрдам юкларини чекка ҳудудларга етказиш учун юк ташувчи дронлар ва 50 дан ортиқ кичик қайиқдан фойдаланилмоқда.
Шунингдек, ҳарбий авиация етиб бориш қийин бўлган ҳудудларга гуманитар юкларни ҳаво орқали ташламоқда.
Мутахассисларнинг таъкидлашича, муссон мавсумида кузатиладиган бундай табиий офатлар Ҳиндистонда ҳар йили такрорланади. Бироқ иқлим ўзгариши ва урбанизация уларнинг сони ҳамда кўламини янада кучайтирмоқда.
