Бухоро шаҳрининг бош режаси тасдиқланди
Режага кўра, ҳисоб даврида шаҳар ҳудуди 7 966,78 гектардан 11 847,06 гектаргача кенгаяди. Магистраль кўчаларнинг узунлиги 102,6 километрдан 203 километргача оширилади.
Ҳукуматнинг 2026 йил 23 июлдаги 402-сон қарори билан Бухоро шаҳрининг бош режаси тасдиқланди. Бу ҳақда "Ҳуқуқий ахборот" Теlegram-канали хабар берди.
Ҳужжатга кўра, ҳисоб даврида Бухоро шаҳри аҳолиси 289,19 минг нафардан 385 минг нафаргача, шаҳар ҳудуди эса 7 966,78 гектардан 11 847,06 гектаргача кенгаяди.
Шунингдек, уй-жой фондининг умумий майдони 4 млн 456,31 минг квадрат метрдан 8 млн 85 минг квадрат метргача етказилиши режалаштирилган. Натижада бир кишига тўғри келадиган уй-жой майдони 15,4 квадрат метрдан 21 квадрат метргача ошади. Ҳисоб даврида 114,66 минг квадрат метр уй-жой фонди қисқариши ҳам назарда тутилган.
Қарорга мувофиқ, аҳолининг ижтимоий соҳа объектларига бўлган эҳтиёжини амалдаги меъёрларга мослаштириш мақсадида маданий, маиший ва коммунал объектлар ривожлантирилади, шунингдек, бўш ҳудудларда янги жамоат мажмуалари барпо этилади.
Бундан ташқари, магистраль кўчаларнинг узунлиги 102,6 километрдан 203 километргача оширилади. Биринчи босқичда бу кўрсаткични 155,35 километрга етказиш режалаштирилган. Йилига 163,8 миллион йўловчига хизмат кўрсатиш қувватига эга жамоат транспорти тизимини шакллантириш ҳам бош режадан ўрин олган.
