Бухорода 60 дан ортиқ фуқарони чув туширган гуруҳ фош этилди
Гумонланувчилар қўлга олинганда улардан ўнлаб банк карталари, SIM-карталар ҳамда махсус мобил қурилмалар ашёвий далил сифатида олинган.
Бухоро вилояти ИИБ Кибержиноятларга қарши курашиш бўлими ходимлари фуқароларнинг банк карталаридаги маблағларни ўғирлаш билан шуғулланган жиноий гуруҳ фаолиятини фош этди.
Дастлабки терговга кўра, республиканинг турли ҳудудларида содир этилган ушбу жиноятлар ортида Самарқанд вилоятида яшовчи 20 ёшга тўлмаган йигит ва унинг бошқа ҳудудлардаги шериклари тургани аниқланган.
Гумонланувчилар қўлга олинганда улардан ўнлаб банк карталари, SIM-карталар ҳамда махсус мобил қурилмалар ашёвий далил сифатида олинган. Тергов органлари ушбу буюмлар гуруҳнинг узоқ вақт давомида йирик миқёсдаги киберўғриликлар билан шуғулланганини тасдиқлашини маълум қилган.
ИИБ маълумотига кўра, гумонланувчилар Telegram орқали бошқарилган яширин аккаунтлар ёрдамида фуқароларнинг телефонларига зарарли APK файлларни юборган. Ушбу дастурлар қурилмага ўрнатилгач, банк иловаларига оид маълумотлар ва пул ўтказмаларини тасдиқловчи СМС-кодлар жиноятчилар назоратига ўтган. Шундан сўнг улар жабрланувчиларнинг банк карталаридаги маблағларни ўзлаштирган.
Талон-торож қилинган пулларнинг изини яшириш мақсадида маблағлар бегона шахслар номига расмийлаштирилган транзит банк карталари ҳамда сохта аккаунтлар орқали бошқа ҳисоб рақамларига ўтказилган. Мазкур жиноий схема оқибатида республиканинг турли ҳудудларида 60 нафардан ортиқ фуқаро жабрланган.
Ҳолат юзасидан гумонланувчига нисбатан Жиноят кодексининг 169-моддаси учинчи қисми "б" банди (ўғрилик) билан жиноят иши қўзғатилган.
Ҳозирда дастлабки тергов ҳаракатлари давом эттирилмоқда. Шунингдек, ушбу жиноий гуруҳга алоқадор бошқа шахсларни аниқлаш, уларни жавобгарликка тортиш ҳамда жабрланган фуқароларнинг ҳуқуқларини тиклаш бўйича чоралар кўрилмоқда.
