Жиззах шаҳрининг бош режасига ўзгартириш киритилди
Ҳужжатга кўра, келгуси йилларда шаҳар ҳудуди қарийб икки баравар кенгайтирилади, транспорт, уй-жой ва муҳандислик инфратузилмаси тубдан модернизация қилинади.
Вазирлар Маҳкамаси Жиззах шаҳрининг бош режасига ўзгартириш киритиш тўғрисидаги қарорни қабул қилди. Ҳужжат билан шаҳарни 2043 йилгача ривожлантиришнинг устувор йўналишлари, ҳудудларни кенгайтириш, уй-жой қурилиши, транспорт ва муҳандислик инфратузилмасини модернизация қилиш бўйича янги кўрсаткичлар белгиланди.
Қарорга кўра, ҳисоб даври якунига қадар Жиззах аҳолиси 191,6 минг нафардан 460 минг нафарга, шаҳар ҳудуди эса 6 520 гектардан 12 730 гектарга етказилади. Уй-жой фондининг умумий майдони қарийб уч баравар оширилиб, 9,66 миллион квадрат метрга етказилиши режалаштирилган. Натижада бир кишига тўғри келадиган уй-жой майдони 15,9 квадрат метрдан 21 квадрат метргача ошади.
Бош режа доирасида ижтимоий инфратузилма ҳам кенгайтирилади. Хусусан, мактабгача таълим муассасаларидаги ўринлар сони 29,4 мингтагача, умумтаълим мактабларидаги ўринлар 78,2 мингтага, шифохоналардаги ўринлар эса 11,4 мингтага етказилади. Шунингдек, поликлиникалар қуввати, меҳмонхоналар, савдо ва маиший хизмат кўрсатиш объектлари сонини ошириш кўзда тутилган.
Шаҳарда транспорт инфратузилмасини модернизация қилиш ҳам режалаштирилган. Магистраль кўчалар узунлиги 90,35 километрдан 263,14 километрга етказилади, жамоат транспорти орқали йилига 230 миллион йўловчига хизмат кўрсатиш имконияти яратилади. Бундан ташқари, транзит транспорт оқимини шаҳар ташқарисига йўналтириш мақсадида шимолий айланма йўл барпо этилади.
Ҳужжатда муҳандислик-коммуникация тармоқларини ривожлантириш ҳам назарда тутилган. Ичимлик суви, канализация, электр, газ ва иссиқлик таъминоти қувватлари бир неча баробар оширилади. Шунингдек, яшил ҳудудлар майдонини 50 гектардан 460 гектарга етказиш, Сангзор дарёси бўйида дам олиш масканларини барпо этиш ҳамда канал ва коллекторлар атрофини кўкаламзорлаштириш режалаштирилган.
Қарорга мувофиқ, Жиззах вилояти ҳокимлиги манфаатдор вазирлик ва идоралар билан биргаликда бош режани босқичма-босқич амалга ошириш бўйича комплекс чора-тадбирлар дастурини ишлаб чиқади. Шунингдек, барча қурилиш ишлари бош режа талабларига мувофиқ олиб борилиши ва тарихий ҳамда маданий мерос объектлари муҳофазаси таъминланиши белгиланган.
