Қайси ҳолларда болалар нафақаси ва моддий ёрдам тўловлари тўхтатилади?
Август ойидан айрим оилалар учун болалар нафақаси ва моддий ёрдам тўловлари тўхтатилиши мумкин. Бунга оиладаги меҳнатга лаёқатли шахсларнинг расмий бандлиги асосий мезон сифатида олинади.
Амалдаги тартибга кўра, "Камбағал оила" тоифасига киритилган оилаларга 2026 йил февраль ойида тайинланган болалар нафақаси ҳамда моддий ёрдамнинг 6 ойлик муддати август ойида якунланади. Тўловларнинг давом эттирилиши ёки тўхтатилиши оиладаги меҳнатга лаёқатли аъзоларнинг бандлигига боғлиқ бўлади. Бу ҳақда Ижтимоий ҳимоя миллий агентлиги хабар берди.
Маълум қилинишича, агар оиладаги меҳнатга лаёқатли шахс охирги олти ой давомида расмий ишламаган ёки Бандлик хизматлари томонидан таклиф этилган мос ишни икки марта ёки ундан кўп рад этган бўлса, болалар нафақаси ва моддий ёрдам тўловлари кейинги ойдан бошлаб тўхтатилади.
Тўловларнинг узлуксиз давом этиши учун меҳнатга лаёқатли оила аъзоси қуйидаги ҳолатлардан бири орқали расмий бандлигини тасдиқлаши лозим:
- меҳнат шартномаси асосида расмий ишга жойлашиш;
- якка тартибдаги тадбиркор (ЯТТ) сифатида рўйхатдан ўтиб, солиқларни ўз вақтида тўлаш;
- ўзини ўзи банд қилган шахс сифатида рўйхатдан ўтиб, белгиланган ижтимоий солиқни тўлиқ тўлаш.
Мутасаддилар болалар нафақаси ва моддий ёрдам давлат томонидан ижтимоий кўмакка муҳтож оилаларни қўллаб-қувватлаш мақсадида ажратилишини, шу боис меҳнатга лаёқатли оила аъзоларининг расмий бандлигини таъминлаш муҳим эканини эслатди.
