Ислоҳотлар бўлмаса, 25 йилдан кейин Европа Иттифоқи йўқ бўлади — Орбан
Венгрия собиқ Бош вазири Европа Иттифоқи ҳозирги ҳолатда ўзини ислоҳ қила олмаётганини айтиб, унинг келажагига шубҳа билдирди.
Руминияда ўтаётган Тусванёш ёзги лагеридаги дастурий нутқида сўзга чиққан Орбан, Европа Иттифоқи яқин йилларда ўзини янгилай олмаса, бошқа халқаро ташкилотлар сингари йўқолиб кетиши ёки тубдан ўзгаришини таъкидлади. Бу ҳақда Point.md хабар берди.
“Мослаша олмайдиганлар йўқ бўлиб кетади. Мен Европа Иттифоқининг йўқолишини истамайман, аммо бугунги ҳолатида у ўзини ислоҳ қилишга қодир эмасдек кўринади. Шу сабабли унинг келажагини порлоқ деб ҳисобламайман”, деди у.
Орбан Европа комиссияси раиси лавозимини эгаллаш таклифига ҳам муносабат билдириб, бу лавозимни сақлаб қолиш эмас, балки бекор қилиш кераклигини айтди. Унинг фикрича, Европа Иттифоқи Комиссиянинг ваколатларини чеклаш орқали ислоҳ қилиниши, бунинг учун эса “Европа учун Ватанпарварлар” гуруҳи Брюсселда ҳокимиятни қўлга олиши лозим.
Собиқ Бош вазирга кўра, Европа Иттифоқидаги муаммолар 2015 йилда, Жан-Клод Юнкер раҳбарлиги даврида Европа комиссияси ҳуқуқий мувофиқлаштирувчи органдан сиёсий органга айлангач бошланган.
Орбан ўтган йили ҳам Тусванёш ёзги лагерида Европа Иттифоқи парчаланиш хавфи остида эканини айтиб, уни фақат кўп тезликли интеграция модели сақлаб қолиши мумкинлигини таъкидлаган эди.
Эслатиб ўтамиз, Виктор Орбан жорий йил апрель ойида бўлиб ўтган сайловларда 16 йиллик бошқарувдан сўнг ҳокимиятни бой берган. Шундан сўнг у тарафдорларини мамлакатда “демократияни тиклаш”га чақирган.
