Кремль Тўқаевнинг Украинадаги можарони музлатиш таклифини рад этди
Кремль Тўқаевнинг таклифини амалдаги шароитда амалга ошириб бўлмаслигини билдирди. Россия бу борадаги асосий шарт сифатида ўз мақсадларига эришишни кўрсатди.
Россия президенти матбуот котиби Дмитрий Песков Қозоғистон президенти Қосим-Жўмарт Тўқаевнинг Украинадаги можарони музлатиш таклифига изоҳ берди.
Песковнинг айтишича, Россия президенти Владимир Путин Тўқаев билан учрашувда унга Украинадаги махсус ҳарбий операциянинг бориши ҳақида батафсил маълумот берган.
"Киевнинг амалдаги позицияси ҳисобга олинса, можарони шунчаки музлатишнинг имкони йўқ. Биз учун асосий шарт — ўз мақсадларимизга эришиш", — деди Кремль вакили.
Унинг таъкидлашича, жанговар ҳаракатларни тўхтатиш шартлари бундан икки йил аввал Россия Ташқи ишлар вазирлиги томонидан баён қилинган. Песковга кўра, агар Киев тегишли қарорларни қабул қилса, ҳарбий ҳаракатлар ҳатто шу куннинг ўзидаёқ тўхтатилиши мумкин.
Аввалроқ Қозоғистон президенти Қосим-Жўмарт Тўқаев Омск шаҳрида Владимир Путин билан учрашувда Украинадаги можарони музлатиш, "Истанбул формуласи 2.0"га қайтиш ҳамда Россия ҳам иштирок этадиган йирик давлатлар кафолати остида тинчлик музокараларини давом эттиришни таклиф қилганди.
