Тошкентнинг модернизм меъморчилиги ЮНЕСКОнинг Халқаро рўйхатига киритилди
Объектлар қаторида “Жемчуг” турар жой биноси, тарих ва санъат музейлари, “Халқлар дўстлиги” саройи, цирк, Марказий кўргазмалар зали, “Космонавтлар” метро бекати, “Қуёш” гелиомажмуаси ҳам бор.
Жанубий Кореянинг Пусан шаҳрида ўтказилаётган ЮНЕСКО Умумжаҳон мероси қўмитасининг 48-сессиясида Тошкентнинг модернизм меъморчилиги объектлари ташкилотнинг нуфузли Халқаро рўйхатига киритилди. Бу ҳақда Президент администрацияси раҳбари Саида Мирзиёева маълум қилди.
Мирзиёеванинг таъкидлашича, бу Ўзбекистон томонидан сўнгги 25 йил ичида ЮНЕСКОга тақдим этилган миллий номинациянинг илк бор шундай юксак мақомга сазовор бўлишидир.
Саида Мирзиёевага кўра, мазкур қарор нафақат бир неча меъморий объект, балки 1966-йилги зилзиладан кейин Тошкентнинг қайта бунёд этилиши билан боғлиқ бутун бир тарихий даврнинг эътирофи ҳисобланади.
Унинг қайд этишича, ўша йилларда пойтахт замонавий меъморчилик, Марказий Осиё анъаналари ва маҳаллий иқлим хусусиятларини уйғунлаштирган ўзига хос меъморий қиёфа касб этган.
Саида Мирзиёева ушбу воқеани Ўзбекистоннинг халқаро майдондаги навбатдаги ютуғи деб баҳолаб, бу бой меъморий асраб-авайлаш ва уни келажак авлодларга етказиш йўлидаги муҳим қадам эканини таъкидлади.
