Юнусободдаги зарарланган дарахтларни соғломлаштириш ишлари бошланди
Дарахтларда бир нечта зараркунанда турлари аниқлангани маълум қилинди.
Ижтимоий тармоқларда Тошкент шаҳри Юнусобод тумани "Биллур" маҳалласи ҳудудидаги кўп қаватли уйлар ёнида ўсаётган дарахтларнинг касаллангани ҳақида мурожаат тарқалгач, ҳолат Экология ва иқлим ўзгариши миллий қўмитаси назоратига олинди.
Шундан сўнг Тошкент шаҳар экология бош бошқармаси, Ўсимликлар карантини ва ҳимояси бошқармаси ҳамда Тошкент шаҳар Ободонлаштириш бошқармаси мутахассислари ҳудудда ўрганиш олиб борди.
Ўрганиш натижасида ҳудуддаги чинор дарахтларида бир неча турдаги зараркунандалар аниқланган. Мутахассислар дарахтларни зараркунандалардан халос этиш бўйича зарур тавсиялар ишлаб чиқиб, соғломлаштириш ишларини бошлаган.
Тошкент шаҳар Ўсимликлар карантини ва ҳимояси бошқармасининг Юнусобод тумани фитосанитария назорати инспектори Азизхўжа Ҳамрохўжаевнинг айтишича, айни пайтда дарахтларга ишлов бериш ва уларни зараркунандалардан ҳимоя қилиш бўйича зарур чора-тадбирлар амалга оширилмоқда.
Қайд этилишича, "Ўсимликларни ҳимоя қилиш тўғрисида"ги қонуннинг 13-моддасига мувофиқ, ўсимликларни зарарли организмлардан ҳимоя қилиш бўйича тадбирларни белгилаш давлат ўсимликлар карантини инспекторлари ваколатига киради.
Мурожаат муаллифи Алексей Менг мутахассислар мурожаатдан сўнг тезкор равишда ҳудудга келиб, дарахтларни даволаш ишларини бошлаганини билдириб, бунинг учун миннатдорлик изҳор этди. Унинг сўзларига кўра, дарахтларнинг илдиз тизимини мустаҳкамлаш ва уларни тиклаш бўйича даволаш ишлари олиб борилмоқда.
Экология ва иқлим ўзгариши миллий қўмитаси дарахтларга шикаст етказиш, уларни зарарлаш ёки ноқонуний кесиш ҳолатлари қонунчиликка мувофиқ жавобгарликка сабаб бўлишини яна бир бор эслатди.
