Нигерияда қишлоққа уюштирилган ҳужумда камида 30 киши ҳалок бўлди
Ҳозирча ҳужум учун ҳеч бир қуролли гуруҳ жавобгарликни ўз зиммасига олмаган.
Нигериянинг шимоли-ғарбидаги Кадуна штатида қуролланган шахслар қишлоққа ҳужум уюштирди. Оқибатда камида 30 киши ҳалок бўлди, яна тўрт киши жароҳат олди.
Маҳаллий аҳоли вакилларининг маълум қилишича, ҳужум ярим тунга яқин Кауру маҳаллий бошқарув ҳудудидаги Наридон қишлоғида содир бўлган. Қуролланган шахслар қишлоққа бостириб кириб, аҳолига қарата тартибсиз ўқ узган ва уйларни ёқиб юборган.
Қишлоқ оқсоқолининг котиби Догон Рана ҳалок бўлганлар орасида саккиз нафар бола ҳам борлигини маълум қилди. Ёшлар етакчиси Ишая Даванинг айтишича, айрим қурбонлар шафқатсизларча ўлдирилган, жасадлар эса моргга олиб кетилган.
Ҳозирча ҳужум учун ҳеч бир қуролли гуруҳ жавобгарликни ўз зиммасига олмаган.
Қайд этилишича, Нигериянинг шимоли-ғарбий ва марказий ҳудудларида қуролли жиноий тўдалар ҳужумлари тез-тез содир бўлиб туради. Мамлакатнинг шимоли-шарқида эса ҳукумат "Боко Ҳарам" ва ундан ажралиб чиққан ISWAP гуруҳи исёнчиларига қарши кураш олиб бормоқда.
Маҳаллий аҳоли сўзларига кўра, хавфсизлик кучлари воқеа жойига ҳужум содир бўлганидан бир неча соат ўтиб етиб келган.
