Ўзбекистонда aвгуст қуруқ ва иссиқ бошланади, ой охирида салқин тушиши кутилмоқда
Ойнинг дастлабки кунларида айрим ҳудудларда ҳаво ҳарорати 43 даражагача кўтарилиши, ой охирига бориб эса 25–30 даражагача пасайиши кутилмоқда.
"Ўзгидромет" Ўзбекистонда 2026 йил август ойи учун об-ҳаво прогнозини эълон қилди.
Прогнозга кўра, август ойининг илк кунларида республика бўйича қуруқ ва бироз иссиқ об-ҳаво кузатилади. Хусусан, 1–2 август кунлари ҳаво ҳарорати 38–41 даражагача, жанубий ва чўл ҳудудларда эса 42–43 даражагача кўтарилади.
Шундан сўнг ҳарорат 3–5 даражага пасайиб, кундуз кунлари асосан 33–38 даража атрофида, айрим ҳудудларда 40 даражагача бўлиши кутилмоқда. Ой охирига келиб эса салқин ҳаво оқимлари кириб келиши ҳисобига ҳарорат аста-секин 25–30 даражагача пасайиши мумкин.
Метеорологларнинг маълум қилишича, август ойининг ўртача ойлик ҳарорати кўп йиллик меъёрларга яқин бўлади. Кечалари ойнинг биринчи ярмида ҳаво ҳарорати 24–27 даража, иккинчи ярмида 17–22 даража, ой якунида эса 12–15 даражагача пасайиши прогноз қилинмоқда.
Ойлик ёғингарчилик миқдори меъёрдан кўпроқ, айрим ҳудудларда эса меъёр атрофида бўлиши кутилмоқда. Бироқ мутахассислар август ойида ёғингарчилик меъёри одатда жуда кам бўлишини эслатди.
Прогнозга кўра, ойнинг иккинчи ярмида айрим кунлари қисқа муддатли, кучсиз ёмғир ёғиши мумкин.
"Ўзгидромет"нинг қайд этишича, август Ўзбекистонда йилнинг энг қурғоқчил ойларидан бири ҳисобланади. Сўнгги йилларда эса глобал иқлим ўзгариши таъсирида август ойининг ўртача ҳарорати 1961–1990 йиллар билан солиштирганда 1,2–1,5 даражага ошган.
