Қарийб 600 миллион сўм ютуққа эга “Йил ўқитувчиси” танловининг финал синовлари ўтказилмоқда
Мазкур танловда Республиканинг 208 та ҳудудида фаолият олиб бораётган жами 416 нафар педагог иштирок этмоқда.
Айни кунларда Мактабгача ва мактаб таълими вазирлиги томонидан Ўзбекистоннинг барча ҳудудларида “Йил ўқитувчиси” танловининг учинчи босқичи бўлиб ўтмоқда.
Юксак билим ва касбий тажрибага эга устозларнинг ўзаро маҳорат майдонига айланиб бораётган мазкур танловда Республиканинг 208 та туман (шаҳар)ида фаолият олиб бораётган жами 416 нафар педагог иштирок этмоқда.
Мазкур босқичда номзодлар жами 100 баллик тизим асосида, қуйидаги 2 та йўналиш бўйича баҳоланади:
— Маънавий-маърифий фаолият йўналиши — Бунда номзоднинг шахсий ривожланиши, ўз устида ишлаши, шунингдек, маънавий-ахлоқий, тарбиявий ва синфдан ташқари фаолияти ҳамда ташаббуслари юзасидан тақдимоти эътиборга олинади ва 20 баллик тизим асосда баҳоланади.
— Тест синови (китобхонлик бўйича) йўналиши — Бунда номзодлар тасдиқланган адабиётлар асосидаги 40 та саволдан иборат тест синовида қатнашади. Ҳар бир тўғри жавоб учун 2 баллдан (жами 80 балл) тақдим этилади.
Маълумот учун: “Йил ўқитувчиси” танловининг дастлабки баҳсларида 2025 йил август-декабрь ойларида ўтказилган малака синовлари натижаларига асосан энг яхши кўрсаткичга эга бўлган 47 минг нафарга яқин педагоглар қатнашган (иккинчи босқичда 624 нафар).
Учинчи (сўнгги) босқичда 416 нафар педагог қатнашмоқда ва синов жараёнларида юқори натижага эришган 208 нафар педагог ғолиб, деб тан олинади.
Вазирлар Маҳкамасининг 2025 йил 28 апрелдаги тегишли қарорига асосан, танловда ҳар бир туман (шаҳар) бўйича биринчи ўринни эгаллаган ғолиб педагоглар базавий ҳисоблаш миқдорининг 1 400 баравари (ҳозирги вақтда 576 млн 800 минг сўм)га тенг пул мукофоти билан тақдирланади.
