Наманганда дарёда чўкиб кетган бир нафар фуқаронинг жасади топилди
Жорий мавсум давомида чўмилиш тақиқланган ҳудудларда сувга тушиш оқибатида бир неча киши ҳалок бўлган.
Ижтимоий тармоқларда Наманган ҳудудидан оқиб ўтувчи Сирдарё дарёсида фуқароларнинг чўкиши билан боғлиқ хабарлар тарқалди.
Наманган вилояти Фавқулодда вазиятлар бошқармаси маълум қилишича, 2026 йил 26 июль куни соат 14:06 да 112 қисқа рақамига Наманган шаҳри “Гулбоғ” МФЙда яшовчи, 2004 йилда туғилган фуқаро Сирдарёнинг Наманган тумани “Шўрқўрғон” МФЙ ҳудудидан оқиб ўтувчи қисмига тушиб кетгани ҳақида мурожаат келиб тушган.
Мазкур ҳолат юзасидан ФВВ вилоят бошқармаси Махсус қутқарув отрядининг сувда қутқарув гуруҳи ғаввослари томонидан қидирув-қутқарув ишлари олиб борилмоқда.
Шунингдек, 27 июль куни бошқа бир фуқаронинг жасади дарёдан топилиб, қутқарувчилар томонидан қирғоққа олиб чиқилган ва тегишли тартибда топширилган.
ФВВ маълумотларига кўра, жорий мавсум давомида чўмилиш тақиқланган ҳудудларда сувга тушиш оқибатида бир неча киши ҳалок бўлган. Ҳозирда ҳам бундай ҳудудларда чўкиб кетган икки нафардан ортиқ фуқарони қидириш ишлари давом эттирилмоқда.
Мутасаддилар фуқароларни, айниқса ота-оналарни фарзандларини назоратсиз равишда сув ҳавзаларига юбормасликка чақирди. Шунингдек, фақат рухсат этилган ва хавфсиз чўмилиш жойларидан фойдаланиш ҳамда сувдаги хавфсизлик қоидаларига риоя қилиш тавсия этилди.
