Инфантино Жаҳон чемпионати улушларини хусусий инвесторларга сотмоқчи
Ташаббус UEFАнинг кескин танқидига сабаб бўлди.
Британиянинг The Times нашрига кўра, FIFА Forward Enterprise деб номланган янги компания тахминан 20 миллиард долларга баҳоланмоқда. Режага кўра, компаниянинг 20–30 фоиз улуши хусусий инвесторларга сотилади, FIFА эса назорат пакетини ўзида сақлаб қолади. Маблағлар футболни ривожлантириш дастурларини молиялаштиришга йўналтирилиши айтилмоқда.
Асосий инвестор сифатида Жошуа Кушнер бошчилигидаги Thrive Capital тилга олинмоқда. Жошуа Кушнер АҚШ президенти Доналд Трампнинг куёви Жаред Кушнернинг укаси ҳисобланади. The Times маълумотига кўра, лойиҳа юзасидан Оқ уй билан ҳам маслаҳатлашувлар ўтказилган.
Нашрнинг ёзишича, агар лойиҳа амалга ошса, Инфантино 2031 йилда FIFА президентлиги муддати тугагач, янги компанияда юқори лавозим эгаллаши ва бунинг эвазига катта миқдорда даромад олиши мумкин. Бироқ FIFА бу борада ҳали якуний қарор қабул қилинмаганини, лойиҳа фақат маслаҳатлашув босқичида эканини билдирди.
UEFА эса ташаббусни кескин танқид қилиб, "Футбол FIFАнинг мулки эмас ва уни сотиш ҳам мумкин эмас. Футболнинг руҳи ва бошқаруви савдо қилинадиган актив эмас", дея баёнот берди.
Европа футбол уюшмаси бу режа футбол бошқаруви тарихида хавфли бурилиш бўлиши мумкинлигини таъкидлаб, шаффофлик йўқлиги ва тижорат манфаатлари спорт қадриятларидан устун қўйилаётганидан хавотир билдирди. Айрим Европа футбол доиралари ҳатто келгусида FIFА билан жиддий қарама-қаршилик юзага келиши ёки Жаҳон чемпионати бойкот қилиниши эҳтимолини ҳам истисно қилмаяпти.
