Мактабларда дарс соатларини тақсимлаш тартиби ўзгарди
Янги тартиб ўқитувчиларнинг иш юкламасини камайтириш, дарс соатларини тақсимлашни соддалаштириш ҳамда жараённи адолатли ташкил этишга қаратилган.
Ижтимоий тармоқларда ўқитувчилар ўртасида дарс соатларини тақсимлаш тартиби ўзгаргани ҳақида тарқалган хабарлар юзасидан Мактабгача ва мактаб таълими вазирлиги расмий изоҳ берди.
Вазирликнинг маълум қилишича, 2025 йил 28-октабрда вазирлик, Иқтисодиёт ва молия вазирлиги ҳамда Соғлиқни сақлаш вазирлигининг қўшма қарори билан “Умумтаълим муассасаларида синфларни комплектлаш ҳамда тарификация рўйхатларини шакллантириш тартиби тўғрисида”ги низомга ўзгартириш ва қўшимчалар киритилган.
Қайд этилишича, мазкур ўзгаришларнинг асосий мақсади ўқитувчиларнинг иш юкламасини камайтириш, дарс соатларини тақсимлаш талабларини соддалаштириш ва жараённи янада шаффоф ҳамда адолатли ташкил этишдан иборат.
Янги тартибга кўра, аввал амалда бўлган дарс соатларини тақсимлашнинг 19 та устуворлик мезони 10 тага қисқартирилган. Вазирликнинг таъкидлашича, бу ўзгаришлар кўплаб ўқитувчиларнинг таклифлари асосида амалга оширилган.
Шунингдек, барча педагоглар учун тенг имконият яратиш мақсадида дунёнинг ТОП-1000 олийгоҳларини тамомлаганлик ёки халқаро ҳамда асосий фан олимпиадаларида ғолиб ўқувчиларни тайёрлаганлик каби мезонлар бекор қилинган. Вазирлик буни бундай имкониятлардан барча ўқитувчилар ҳам фойдалана олмаслиги билан изоҳлади.
Эндиликда дарс соатларини тақсимлашда асосий эътибор миллий ёки халқаро сертификатларга эга, замонавий компетенцияларни эгаллаган ҳамда касбий салоҳияти ва меҳнат натижаларини намоён этган педагогларга қаратилади.
Вазирликка кўра, мазкур тартиб ўз устида мунтазам ишлайдиган, юқори малакали ўқитувчиларни қўллаб-қувватлаш, таълим сифатини ошириш ва ўқувчиларнинг билим натижаларини яхшилашга хизмат қилади. Янги тартиб 2026/2027-ўқув йилидан бошлаб амалиётга жорий этилади.
