Ўзбекистонда ажримларнинг қарийб ярми фарзандсиз оилалар ҳиссасига тўғри келмоқда
Энг кўп ажрим Тошкент шаҳри ва Тошкент вилоятида қайд этилган.
2026 йилнинг дастлабки олти ойида Ўзбекистонда 24,8 мингта никоҳдан ажралиш ҳолати қайд этилди. Бу ўтган йилнинг мос даврига нисбатан 1,5 мингтага кўпдир.
Статистик маълумотларга кўра, ҳар минг аҳолига тўғри келадиган ажримлар коэффициенти 1,3 промиллени ташкил этган.
Ажримларнинг 14,9 мингтаси (60,1 фоизи) шаҳарларда, 9,9 мингтаси (39,9 фоизи) эса қишлоқ ҳудудларида қайд этилган.
Шунингдек, 2026 йилнинг иккинчи чорагида ажримларнинг 48,1 фоизи фарзандсиз оилалар ҳиссасига тўғри келган. Биринчи чоракда бу кўрсаткич 45,2 фоизни ташкил этган бўлса, иккинчи чоракда у 2,9 фоиз пунктга ошган.
Ҳудудлар кесимида энг кўп никоҳдан ажралиш ҳолатлари Тошкент шаҳри, Тошкент вилояти ва Самарқанд вилоятида қайд этилган. Энг паст кўрсаткичлар эса Сирдарё, Навоий ва Жиззах вилоятлари ҳиссасига тўғри келган.
Статистикага кўра, никоҳдан ажралишларнинг асосий қисми шаҳарларда содир бўлаётгани, шунингдек, ажримларнинг салмоқли қисми фарзандсиз оилаларда қайд этилаётгани кузатилмоқда.
