“Бунёдкор” молиявий муаммолар сабаб Суперлига доирасидаги сафар ўйинига бормайди
Жамоада харажатларни қоплаш учун маблағ мавжуд эмас.
“Бунёдкор” клуби Ўзбекистон Суперлигаси 15-тури доирасида “Қизилқум”га қарши Навоийда ўтказилиши режалаштирилган учрашувга бора олмаслигини маълум қилди. Бу ҳақда Ўзбекистон Профессионал футбол лигаси (ЎзПФЛ) хабар берди.
Лига маълумотига кўра, клуб расмий мактубида сафарга чиқмасликка оғир молиявий аҳвол сабаб бўлганини билдирган. Қайд этилишича, жамоада йўл чипталарини харид қилиш, меҳмонхонада жойлашиш ҳамда делегация аъзоларининг овқатланиш харажатларини қоплаш учун маблағ мавжуд эмас.
Аввалроқ “Бунёдкор” бош мураббийи ва бир қатор футболчилар бир неча ойдан буён маош олмаганини, шунингдек, клуб инфратузилмасида ҳам жиддий муаммолар мавжудлигини маълум қилганди.
ЎзПФЛнинг таъкидлашича, амалдаги Суперлига регламентига мувофиқ, агар жамоа узрсиз равишда учрашувга етиб бормаса, унга техник мағлубият ёзилади. Шу сабабли “Қизилқум” — “Бунёдкор” учрашуви бўйича якуний қарор регламент асосида қабул қилинади.
