АҚШ ва Исроил разведкаси Мужтабо Хоманаийни қидирмоқда — The Times
Хоманаий 150 кундан ортиқ вақт давомида электрон алоқа воситаларидан фойдаланмаган ва омма олдида кўринмаган.
Британиянинг The Times нашри хабар беришича, АҚШнинг Марказий разведка бошқармаси (CIA) ҳамда Исроилнинг Mossad разведка хизмати Мужтабо Хоманаийнинг қаердалигини аниқлашга ҳаракат қилмоқда.
Нашрнинг ёзишича, Хоманаий узоқ вақт давомида омма олдида кўринмаган ҳамда 150 кундан ортиқ вақт мобайнида телефон ва бошқа электрон алоқа воситаларидан фойдаланмаган.
The Times манбаларига кўра, у хавфсизлик нуқтайи назаридан яхши қўриқланадиган бункерда бўлиши ва ташқи дунё билан фақат воситачилар орқали алоқа қилаётгани тахмин қилинмоқда.
Mossadнинг собиқ юқори мартабали ходими Рами Игранинг таъкидлашича, Исроил разведкаси Мужтабо Хоманаийнинг жойлашувини аниқлаш мақсадида Эрон ҳудудидаги агентура тармоғидан фойдаланмоқда. Унинг фикрича, электрон алоқа бўлмаган тақдирда ҳам раҳбар билан боғланишда иштирок этаётган курьерлар ва воситачилар асосий эътибор марказида.
Шу билан бирга, Тел-Авивдаги Миллий хавфсизлик тадқиқотлари институти таҳлилчиси Бени Сабти Мужтабо Хоманаийнинг жамоатчиликдан йироқда бўлиши Эрон раҳбариятидаги айрим гуруҳларнинг таъсирини кучайтираётган бўлиши мумкинлигини билдирган.
