Испаниянинг Сеута анклавида рекорд даражадаги ноқонуний миграция оқими кузатилди

Испаниянинг Шимолий Африкадаги Сеута анклавига кузатилган мисли кўрилмаган ноқонуний миграция оқими тўхтатилди. Бу ҳақда Reuters хабар берди.

 

Испания расмийларига кўра, пайшанбадан буён чегарани кесиб ўтган ўн минглаб одамларнинг қарийб ярми ихтиёрий равишда Марокашга қайтган. Ҳодиса Европа бўйлаб миграция сиёсати юзасидан кескин баҳсларни кучайтирди.

 

Испания Ички ишлар вазирлиги маълумотига кўра, пайшанба тонгидан бошлаб Сеутага қуруқлик ва денгиз орқали тахминан 50 минг киши ноқонуний кирган. Уларнинг қарийб 25 минг нафари аллақачон Марокашга қайтган.

 

Сеута маҳаллий ҳукумати раҳбари Хуан Хесус Виваснинг айтишича, 60 мингга яқин одам дарёдан ўтиб кетган ва 34 киши ҳалок бўлган. Аввалроқ Испания расмийлари денгиздан 19 нафар ҳалок бўлган шахснинг жасади топилганини билдирганди.

 

Марокаш хавфсизлик кучлари Сеута чегарасида тўпланган оломонни кўздан ёш оқизувчи газ, таёқлар ва сув пуркагич машиналари ёрдамида тарқатишга уринди. Reuters мухбирлари чегарада тўқнашувлар оқибатида ёниб кетган автобус ва бир неча автомобиль қолдиқлари қолганини, Испания томонида эса ҳарбий техника жойлаштирилганини кузатган.

 

Айни пайтда юзлаб муҳожирлар назорат пунктлари ҳамда тўсиқлардаги очиқ жойлар орқали Марокашга қайтишда давом этмоқда. Уларнинг айримлари Сеутада озиқ-овқат ва бошпана топа олмаганини айтган.

 

Испания бош вазири Педро Санчес Сеутага ташрифи чоғида оммавий ноқонуний киришни мамлакатнинг ҳудудий суверенитетига тажовуз деб баҳолади. Унинг айтишича, Мадрид Марокаш билан ҳамкорликда ноқонуний кирганларни тезкор равишда ортга қайтармоқда.

 

Сеута ва Мелиля — Марокаш ҳудудидаги Испанияга қарашли автоном шаҳарлардир. Улар Европа Иттифоқининг Африка қитъасидаги ягона қуруқлик чегараларига эга ҳудудлари ҳисобланади. Ушбу ҳудудларда ноқонуний миграция аввал ҳам кузатилган бўлса-да, бу галги оқим кўлами жиҳатидан рекорд даражага етгани таъкидланмоқда.

 

Испания Фуқаролик гвардияси полициячилари уюшмаси (АUGC) оммавий бостириб кириш вақтида чегарани назорат қилиш учун куч ва воситалар етарли бўлмаганини маълум қилди. Расмийлар муҳожирлар оқимининг кучайишига Испания Олий судининг Сеута ва Мелиляга денгиз орқали етиб келган айрим муҳожирларни дарҳол ортга қайтаришни чекловчи яқинда қабул қилинган қарори ҳам таъсир қилган бўлиши мумкинлигини билдирмоқда.

 

Миграция инқирози Европа давлатлари ўртасида ҳам кескин мунозараларга сабаб бўлди. Франция Испания билан чегарадаги назоратни кучайтиришини эълон қилди. Италия бош вазири Жоржа Мелони эса зарурат туғилганда Испания билан Шенген режимини вақтинча тўхтатиб туриш масаласини кўриб чиқишга тайёрлигини билдирди.

 

Италия ташқи ишлар вазири Антонио Таяни Испаниянинг ноқонуний муҳожирларга нисбатан амнистия сиёсати одам савдосини рағбатлантирганини таъкидлади. Мадрид эса бу баёнот ортидан Италия элчисини Ташқи ишлар вазирлигига чақириб, расмий норозилик билдирди.

 

Бундан ташқари, Франциянинг ўта ўнг қанотдаги Миллий бирлик партияси етакчиси Марин Ле Пен президент этиб сайланган тақдирда Шенген ҳудудидаги эркин ҳаракатланиш ҳуқуқини фақат Европа давлатлари фуқаролари билан чеклаш ниятида эканини маълум қилди.