Ўзбекистонда замонавий бассейн қурган тадбиркорларга 100 млн сўмгача субсидия берилади
2028 йилгача фойдаланишга топшириладиган дастлабки 100 та бассейн учун қурилиш ва ишга тушириш харажатларининг 50 фоизигача қисми қоплаб берилади.
Ҳукумат замонавий сузиш ҳавзалари (бассейнлар) қурилишини рағбатлантириш мақсадида янги субсидия механизмини жорий этди. Бу ҳақда Туризм қўмитаси хабар берди.
Эндиликда тадбиркорлар қурилиш ва фойдаланишга топшириш харажатларининг 50 фоизигача, бироқ 100 млн сўмдан ошмаган қисмини давлат ҳисобидан қоплаб олиши мумкин.
Ҳукумат қарори билан “Янги замонавий сузиш ҳавзаларини (бассейн) қуриш ва ишга тушириш билан боғлиқ харажатларни қоплаш бўйича давлат хизматини кўрсатиш”нинг маъмурий регламенти тасдиқланди.
Унга кўра, субсидия 2026 йил 1 февралдан 2028 йил 1 январгача фойдаланишга топшириладиган дастлабки 100 та замонавий сузиш ҳавзаси учун ажратилади.
Субсидия олишни истаган тадбиркор солиқ ва бошқа мажбурий тўловлар бўйича қарздор бўлмаслиги, қайта ташкил этиш ёки тугатиш жараёнида бўлмаслиги, фаолияти қонунчиликка мувофиқ вақтинча тўхтатилмаган ҳамда суд қарори билан тўловга қобилиятсиз деб топилмаган бўлиши керак.
Аризалар Давлат хизматлари марказлари ёки Ягона интерактив давлат хизматлари портали (ЯИДХП) орқали Туризм қўмитасига тақдим этилади.
Аризага сузиш ҳавзасининг лойиҳа ҳужжатлари, қурилиш ва ишга тушириш бўйича пудрат шартномаси ҳамда амалга оширилган тўловларни тасдиқловчи электрон ҳужжатлар илова қилинади.
Туризм қўмитаси субсидия ажратиш тўғрисида қарор қабул қилганидан сўнг, маблағлар 10 иш куни ичида талабгорнинг ҳисоб рақамига ўтказиб берилади.
Мазкур механизм ҳудудларда туризм ва спорт инфратузилмасини ривожлантириш, соғлом турмуш тарзини оммалаштириш ҳамда янги инвестиция лойиҳаларини қўллаб-қувватлашга қаратилган.
