Фермерларга дизель ёқилғиси учун 2 млн сўмгача субсидия берилади
Субсидия фақат биржа савдолари орқали харид қилинган дизель ёқилғисига татбиқ этилади.
Адлия вазирлиги қишлоқ хўжалиги корхоналари томонидан биржа савдолари орқали харид қилинган дизель ёқилғиси қийматининг бир қисмини қоплаш учун субсидия ажратиш тартиби тўғрисидаги вақтинчалик низомни давлат рўйхатидан ўтказди.
Низомга кўра, пахта ва буғдой етиштирувчи фермерлар 2026 йил 1 апрелдан 1 июлгача биржа савдолари орқали сотиб олган дизель ёқилғисининг бир тоннаси нархи 13 млн сўмдан ошган тақдирда, ошган сумманинг 2 млн сўмгача бўлган қисми давлат томонидан субсидия сифатида қоплаб берилади.
Субсидиялар проактив, яъни автоматик тартибда ажратилади. Бунинг учун фермерлардан алоҳида ариза топшириш талаб этилмайди.
Субсидиядан фойдаланиш учун дизель ёқилғиси фақат биржа савдолари орқали харид қилинган бўлиши, фермернинг экин майдонлари ва экин турлари Агропортал тизимига киритилган бўлиши ҳамда харид қилинган ёқилғи апрель—июнь ойларидаги агротехник ишларда фойдаланилган бўлиши лозим.
Субсидия миқдори Агропортал маълумотлари асосида автоматик ҳисобланади. Ҳисобланган маблағлар ваколатли агентлик томонидан фермернинг тижорат банкидаги махсус ҳисобварағига уч иш куни ичида ўтказилади.
Агар техник носозлик ёки маълумотлар алмашинувидаги узилиш сабабли фермер ҳақидаги маълумотлар агентликка етиб бормаса, у агентликка ёзма равишда ёки Агропортал орқали электрон шаклда мурожаат қилиши мумкин.
