Президент ва номдор давлат стипендияларига ҳужжатлар қабули бошланди
Аризалар 15 августгача қабул қилинади, талабгорлар ўзлаштириш ва илмий фаолият бўйича белгиланган мезонларга жавоб бериши лозим.
1 августдан Ўзбекистонда Республика номли ҳамда Президент давлат стипендияларига номзодлардан ҳужжатлар қабул қилиш бошланди. Бу ҳақда Олий таълим, фан ва инновациялар вазирлиги маълум қилди.
Вазирлик хабарига кўра, ҳужжатлар 15 августга қадар my.edu.uz платформаси орқали электрон шаклда қабул қилинади. Танловда олий таълим муассасасининг биринчи босқич саралашидан муваффақиятли ўтган иқтидорли бакалавриат талабалари иштирок этиши мумкин.
Президент давлат стипендиясига даъвогарларнинг академик ўзлаштириш кўрсаткичлари тўлиқ “5” баҳолардан иборат бўлиши керак. Республика номли давлат стипендияларига номзодлар учун эса “4” баҳолар улуши 25 фоиздан ошмаслиги, “3” баҳоси мавжуд талабалар танловда қатнаша олмаслиги белгиланган.
Номзодлар академик маълумотнома (транскрипт), деканат ва кафедра тавсияномалари, илмий ёки ижодий иш раҳбарининг тавсияномаси, илмий ишлари рўйхати ва уларнинг нусхалари, шунингдек, Ўзбекистон тарихи ҳамда чет тиллари бўйича суҳбат натижалари ҳақидаги маълумотномаларни тақдим этиши лозим.
Бундан ташқари, Президент давлат стипендиясига ҳужжат топшираётган бакалавриат талабалари камида иккита эълон қилинган илмий мақола, тезис ёки бошқа илмий-тадқиқот ишига эга бўлиши талаб этилади.
Ҳукуматнинг 2026 йил 6 январдаги қарори билан 2026/2027-ўқув йилидан бошлаб Президент ва номдор давлат стипендияларига номзодларни саралашнинг янги тартиби жорий этилган.
Янги тартибга мувофиқ, талабгорлар Билим ва малакаларни баҳолаш агентлигида ахборот технологиялари, Ўзбекистон тарихи ҳамда чет тиллари фанлари бўйича махсус тест синовларини топширади. Кейинги босқичга ўтиш учун максимал баллнинг камида 55 фоизини тўплаш талаб этилади.
