Қашқадарёдаги Тахтақорача довонида ёнғин юз берди
Ҳодиса оқибатида 1,3 гектар майдондаги қуруқ ўтлар ёниб кетган, дарахт ва буталарга зарар етмаган.
Қашқадарё вилоятининг Китоб тумани ҳудудидаги Тахтақорача довонида содир бўлган ёнғин қисқа вақт ичида бартараф этилди.
Маълум қилинишича, ёнғин 2 август куни соат 13:50 атрофида Китоб давлат ўрмон хўжалиги ҳудудида юзага келган. Ёнғинни бартараф этишга Китоб давлат ўрмон хўжалиги, туман Экология ва иқлим ўзгариши бўлими ҳамда Китоб, Шаҳрисабз ва Яккабоғ туманлари Фавқулодда вазиятлар бўлимлари ходимлари жалб этилган. Тезкор чоралар натижасида ёнғин соат 14:30 да тўлиқ ўчирилди.
Дастлабки маълумотларга кўра, ёнғин натижасида 1,3 гектар майдондаги қуруқ ўтлар зарар кўрган. Ўрмон ҳудудидаги мавжуд дарахт ва буталарга шикаст етмаган.
Ҳозирда воқеа жойида ўрмон хўжалиги ва экология ходимларидан иборат навбатчилик гуруҳи фаолият юритмоқда. Ёнғиннинг келиб чиқиш сабаблари ўрганилаётгани билдирилди.
Мутасаддилар фуқароларни ёзнинг иссиқ кунларида тоғли ҳудудлар ҳамда автомобиль йўллари бўйидаги ўрмон фонди ерларида ёнғин хавфсизлиги қоидаларига қатъий амал қилишга ва табиатга эҳтиёткорона муносабатда бўлишга чақирди.
