АҚШнинг 109 млн долларлик F-35B қирувчи самолёти ҳалокатга учради

АҚШнинг F-35B русумидаги бешинчи авлод қирувчи самолёти Калифорния штатида ҳалокатга учради. Учувчи катапулт тизими ёрдамида самолётни тарк этишга муваффақ бўлган ва унинг ҳаётига хавф йўқлиги маълум қилинди. Бу ҳақда Al Jazeera хабар берди.

 

АҚШ Денгиз пиёдалари корпуси маълумотига кўра, ҳодиса Сан-Диегодаги Мирамар авиабазаси яқинида юз берган. Учувчи воқеа жойидан тиббиёт муассасасига олиб борилган. Унинг аҳволи барқарор экани, ҳаёт учун хавф туғдирмайдиган жароҳатлар олгани билдирилди.

 

Ҳодиса жойидан олинган ҳаводаги тасвирларда самолёт қулаган даладан қалин қора тутун кўтарилгани кўринади. Воқеа жойига ҳарбийлар, ёнғин-қутқарув бўлинмалари ва махсус техникалар жалб этилган. Қутқарувчилар самолёт ҳалокати ортидан юзага келган ўт-ўлан ёнғинини бартараф этиш ишларини олиб борган.

 

Мирамар авиабазаси аввалроқ АҚШ Ҳарбий-денгиз кучларининг машҳур Top Gun қирувчи учувчилар мактабига мезбонлик қилган. Мазкур мактаб 1996 йилда Невада штатидаги Фаллон авиабазасига кўчирилган.

 

F-35B — F-35 оиласининг қисқа масофадан учиб чиқиш ва вертикал қўниш имкониятига эга модификацияси ҳисобланади. Бир дона бундай самолётнинг қиймати тахминан 109 миллион долларни ташкил этади.

 

АҚШ Ҳисоб палатасининг (GAO) 2024 йилдаги ҳисоботига кўра, АҚШ Қуролли кучлари таркибида 630 тадан ортиқ F-35 самолёти хизмат қилмоқда. Келгусида яна 1 800 дан ортиқ самолёт харид қилиниши режалаштирилган бўлиб, бутун F-35 дастурининг умумий қиймати қарийб 2 триллион долларга етиши кутилмоқда.

 

Flight Safety Foundation таркибидаги Aviation Safety Network маълумотларига кўра, бу жорий йил АҚШда ҳалокатга учраган камида саккизинчи ҳарбий самолёт бўлди. Энг йирик авиаҳалокат июнь ойида Калифорниядаги Можаве чўлида содир бўлиб, B-52 стратегик бомбардимончи самолёти қулагани оқибатида бортдаги саккиз кишининг барчаси ҳалок бўлган.