Қамчиқ довонида Isuzu ва Epica тўлиқ ёниб кетди
Epica ҳайдовчиси бошқарувни йўқотиб, йўл четида тўхтаб турган юк машинасига урилган.
Қамчиқ довонида юк автомобили ва енгил автомобиль иштирокида содир бўлган йўл-транспорт ҳодисаси оқибатида иккала транспорт воситаси тўлиқ ёниб кетди. Бу ҳақда ЙҲХХ хабар берди.
Маълум қилинишича, воқеа 2 август куни соат 08:20 атрофида А-373 автомобиль йўлининг Қамчиқ довони ҳудудидан ўтувчи 168-километрида содир бўлган.
Дастлабки маълумотларга кўра, Тошкент–водий йўналишида ҳаракатланаётган Isuzu русумли юк автомобилида техник носозлик юзага келган. Шу сабабли ҳайдовчи транспорт воситасини йўл четига тўхтатган.
Орадан кўп ўтмай, шу йўналишда ҳаракатланаётган Epica русумли автомобиль ҳайдовчиси бошқарувни йўқотиб, тўхтаб турган юк автомобилининг орқа қисмига келиб урилган.
Тўқнашув оқибатида ёнғин келиб чиқиб, ҳар икки автомобиль тўлиқ ёниб кетган. Ҳодисада Epica автомобили ҳайдовчиси ва бир нафар йўловчи енгил тан жароҳати олган. Уларга воқеа жойида биринчи тиббий ёрдам кўрсатилган.
Ҳодиса жойига Фавқулодда вазиятлар вазирлиги ҳамда Йўл-патруль хизмати ходимлари жалб этилиб, ҳаракат хавфсизлиги таъминланди. Айни пайтда транспорт воситаларини қатнов қисмидан олиб ташлаш ишлари олиб борилмоқда.
