Тошкентда “квартиралар банки” ташкил этилади
Реновация ҳудудидаги мулкдорларга компенсация сифатида ёки вақтинча яшаш учун уй-жойлар тақдим этилади.
Тошкент шаҳрида реновация ҳудудидаги мулкдорларга компенсация ва вақтинча яшаш учун уй-жой ажратишни таъминлайдиган “квартиралар банки” ташкил этилади. Бу Президентнинг “Тошкент шаҳрини 2026–2027 йилларда ижтимоий-иқтисодий ривожлантириш бўйича қўшимча чора-тадбирлар тўғрисида”ги қарорида белгиланган.
Ҳужжатга кўра, мазкур тизим реновация лойиҳаларини самарали амалга ошириш ҳамда мулкдорларнинг ҳуқуқларини ҳимоя қилиш мақсадида 2031 йил 1 январга қадар эксперимент тариқасида Tashkent Invest компанияси томонидан шакллантирилади.
“Квартиралар банки” учун турар ва нотурар жойлар таклиф сўрови асосида харид қилинади. Ушбу уй-жойлардан реновация ҳудудидаги мулкдорларга компенсация сифатида ёки вақтинча ижара учун фойдаланилади. Уларни тақсимлаш тартиби Халқ депутатлари Тошкент шаҳар кенгаши томонидан тасдиқланади.
Қарорга мувофиқ, Tashkent Invest “квартиралар банки”ни шакллантиришда Тошкент шаҳрини ривожлантириш жамғармаси маблағлари ҳамда қонунчиликда тақиқланмаган бошқа манбалардан фойдаланиши мумкин.
Шунингдек, реновация ҳудудларидаги давлат мулки ҳисобланган кўчмас мулклар утилизация қиймати бўйича компания тасарруфига ўтказилади. Давлат иштирокидаги корхоналарга тегишли кўчмас мулклар эса мустақил баҳолаш асосида уч йил давомида бўлиб-бўлиб тўлаш шарти билан сотилади.
Бундан ташқари, компанияга инвесторлар ва пудрат ташкилотларини жалб қилган ҳолда Тошкент шаҳрини ривожлантириш жамғармаси маблағлари ҳисобидан объектларни қуриш ёки реконструкция қилиш ҳамда уларни электрон онлайн аукцион орқали сотиш ҳуқуқи берилади. Реновация доирасидаги тайёр бизнес лойиҳалари учун пудрат ташкилотлари белгиланган тартибда танлаб олинади.
Мазкур қарорда яна бир қатор янгиликлар ҳам назарда тутилган. Жумладан, Тошкент шаҳридаги майдони 5 минг квадрат метрдан ортиқ савдо марказларида китоб дўконларини ташкил этиш мажбурий этиб белгиланади, Сув ресурсларини бошқариш маркази ташкил қилинади, шунингдек, пойтахтдаги 35 та бозор ва савдо мажмуаси ҳамда уларнинг филиаллари оммавий савдоларга чиқарилади.
