Ҳиндистондаги сув тошқинлари оқибатида ҳалок бўлганлар сони 85 нафарга етди
Табиий офат оқибатида 349 та аҳоли пункти сув остида қолган бўлиб, 300 мингдан ортиқ аҳоли жабр кўрган.
Ҳиндистоннинг шимоли-шарқидаги Ассам штатида кузатилаётган кучли сув тошқинлари оқибатида ҳалок бўлганлар сони 85 нафарга етди. Бу ҳақда штатнинг Табиий офатларни бошқариш бошқармаси маълум қилди дейди ТАСС.
Расмий маълумотларга кўра, табиий офат оқибатида 349 та аҳоли пункти сув остида қолган бўлиб, 300 мингдан ортиқ аҳоли жабр кўрган. Шунингдек, сув тошқинлари 15 минг 400 гектардан ортиқ қишлоқ хўжалиги ерларига зарар етказган.
Ҳудудда қутқарув ишлари давом этмоқда. Ҳиндистон армияси ҳамда ҳарбий-ҳаво кучлари қутқарув операцияларига жалб этилган. Ташқи дунё билан алоқаси узилган, бориш қийин бўлган ҳудудларга зарур озиқ-овқат ва дори-дармонларни етказиш учун дронлардан фойдаланилмоқда.
Айни пайтда Ассамнинг 10 та туманида 44 та вақтинчалик эвакуация лагери ташкил этилган бўлиб, уларда 15 мингга яқин фуқаро жойлаштирилган. Шунингдек, жабрланган аҳолига ёрдам кўрсатиш мақсадида гуманитар ёрдам тарқатиш марказлари фаолият юритмоқда.
Мутасаддилар ҳудуддаги вазиятни назоратга олган бўлиб, қутқарув ва тиклаш ишлари давом эттирилмоқда.
