Покистондаги тинчлик митингида террорчи ўзини портлатди
Портлаш оқибатида камида 14 киши ҳалок бўлган.
СNN хабарига кўра, ҳодиса Сват туманининг Кабал шаҳрида юз берган. Юзлаб одамлар полиция бўлими яқинида терроризмга қарши шиорлар билан тинчлик намойишини ўтказаётган пайтда террорчи одамлар орасида ўзини портлатган. Дастлабки маълумотларга кўра, қурбонлар орасида 5 нафар полициячи ва 9 нафар тинч аҳоли вакили бор. Яна 20 дан ортиқ киши турли даражада тан жароҳати олган.
Воқеа гувоҳларининг айтишича, портлашдан бир неча дақиқа аввал митинг иштирокчилари ҳукуматни минтақада хавфсизликни кучайтиришга ва қуролли гуруҳларга қарши қатъий чоралар кўришга чақирган. Портлаш намойиш энг гавжум паллага етган вақтда содир бўлган.
Ҳужум учун ҳозирча ҳеч бир қуролли гуруҳ жавобгарликни ўз зиммасига олмаган. Шунга қарамай, ҳуқуқ-тартибот идоралари асосий гумонни "Теҳрик-и Толибон Покистон" (ТТП) ҳаракатига қаратмоқда. Сўнгги йилларда ушбу гуруҳ Хайбер Пахтунхва вилоятида хавфсизлик кучлари ва тинч аҳолига қарши ҳужумларни кескин кўпайтирган.
Покистон президенти Осиф Али Зардорий ва бош вазир Шаҳбоз Шариф ҳужумни кескин қоралаб, айбдорларни жавобгарликка тортиш ва жабрланганларга барча зарур ёрдам кўрсатилишини маълум қилди.
