Россиянинг Геленжик курортидаги пляжга дрон қулаши оқибатида 7 киши ҳалок бўлди
Ҳодиса туфайли яна 47 киши жароҳатланди. Украина дрон Россия армияси радиоэлектрон кураш воситаси таъсирида қулаганини билдирди.
Россиянинг Краснодар ўлкасидаги Геленжик шаҳри яқинида жойлашган Архипо-Осиповка қишлоғидаги пляжга уюштирилган дрон ҳужуми оқибатида 7 киши, жумладан 3 нафар бола ҳалок бўлди. Яна 47 киши турли даражада тан жароҳати олди. Бу ҳақда Ведмости хабар берди.
Краснодар ўлкаси тезкор штаби маълумотига кўра, ҳужум 3 август куни эрталаб содир бўлган. Дастлаб 13 нафар жабрланган ҳақида хабар берилган бўлса, кейинчалик қурбонлар ва жабрланганлар сонига аниқлик киритилган.
Геленжик шаҳар-курорти раҳбари Алексей Богодистовнинг билдиришича, жабрланганларнинг 21 нафари шифохонага ётқизилган, 19 нафарга амбулатор тиббий ёрдам кўрсатилган.
Ҳодисадан сўнг Архипо-Осиповкада тезкор штаб ташкил этилди. Воқеа жойига фавқулодда вазиятлар тиббиёти бўйича ихтисослаштирилган бригада юборилган. Шунингдек, Геленжик, Туапсе ва Краснодар шаҳарларидан тез тиббий ёрдам бригадалари жалб этилган.
Ҳодисага Россия Ташқи ишлар вазирлиги ҳам муносабат билдирди. Вазирлик расмий вакили Мария Захарова НАТО ва Европа Иттифоқини терроризмга нисбатан илгари билдирган позициясидан чекинишда айблади.
Украина Телеграм-каналлари дрон радиоэлектрон кураш (РЕК) воситалари таъсири оқибатида бошқарувни йўқотиб, пляжга қулаганини даъво қилмоқда.
Россия Мудофаа вазирлиги маълумотига кўра, 3 августга ўтар кечаси Краснодар ўлкаси ва Қора денгиз акваторияси Украина томонидан дронлар билан ҳужумга учраган. Вазирлик ушбу ҳудудлар осмонида учувчисиз учиш аппаратлари йўқ қилинганини, Россия ҳудуди узра жами 131 та дрон уриб туширилганини маълум қилди.
