Тошкентда ноқонуний дори савдоси билан шуғулланган оила фош этилди
Улар дори воситаларини Россиядан йўловчилар кўмагида кичик партияларда темирйўл ва самолёт орқали олиб келиб, Тошкентда сотиш билан шуғулланган.
Давлат хавфсизлик хизмати ва Божхона қўмитаси ходимлари ҳамкорлигида ўтказилган тезкор тадбирда Россиядан ноқонуний олиб кирилган контрафакт дори воситалари савдосига чек қўйилди. Бу ҳақда ДХХ хабар берди.
Тезкор тадбир давомида Тошкент шаҳрининг Янгиҳаёт туманида яшовчи 1963 йилда туғилган фуқаро ҳамда унинг икки нафар фарзандига тегишли Тошкент шаҳри ва Тошкент вилоятида жойлашган учта хонадон кўздан кечирилган.
Текширув жараёнида ушбу манзиллардан «Бусерелин», «Волини», «Бикана», «Тирзетта» ва бошқа номдаги жами 29 турдаги 1330 қути контрафакт дори воситалари аниқланиб, процессуал тартибда расмийлаштирилган.
Дастлабки ҳисоб-китобларга кўра, мусодара қилинган маҳсулотларнинг умумий қиймати тахминан 600 миллион сўмни ташкил этади.
Аниқланишича, мазкур оила аъзолари дори воситаларини Россия Федерациясидан йўловчилар ёрдамида кичик партияларда темир йўл ва ҳаво транспорти орқали ноқонуний олиб кириб, уларни Тошкент шаҳрида сотиш билан шуғулланиб келган.
Ҳозирда мусодара қилинган дори воситалари юзасидан экспертиза тайинланган, ҳолат бўйича суриштирув ишлари давом эттирилмоқда.
