Ўзбекистон Президентининг яна бир глобал ташаббуси БМТда кенг эътироф этилди ва қабул қилинди
Ташаббусда парламентларнинг ижтимоий ривожланишдаги ўрни, аёллар ва ёшларнинг парламентдаги иштирокини кенгайтириш ҳамда халқаро ҳамкорликни кучайтириш масалалари ўз аксини топган.
БМТ Бош Ассамблеяси Ню-Ёрк шаҳрида бўлиб ўтган йиғилишда “Ижтимоий ривожланишни жадаллаштиришда парламентларнинг ролини кучайтириш тўғрисида”ги резолюцияни аъзо давлатларнинг мутлақ кўпчилик овози билан қабул қилди.
Мазкур ташаббус илк бор Ўзбекистон Президенти Шавкат Мирзиёев томонидан 2020 йил сентябрь ойида БМТ Бош Ассамблеясининг 75-сессиясидаги нутқида илгари сурилган эди. Кейинги йилларда олиб борилган дипломатик ишлар натижасида ушбу ғоя резолюция лойиҳаси сифатида шакллантирилиб, БМТга аъзо давлатлар томонидан қўллаб-қувватланди.
Резолюцияда Тошкент шаҳрида ўтказилган Парламентлараро иттифоқнинг 150-Ассамблеяси ҳамда унинг якунида қабул қилинган Тошкент декларациясининг аҳамияти алоҳида қайд этилган.
Ҳужжат парламентларнинг ижтимоий ривожланишдаги ролини кучайтириш, аёллар ва ёшларнинг парламент фаолиятидаги иштирокини кенгайтириш, ривожланаётган давлатларни қўллаб-қувватлаш ҳамда ижтимоий соҳадаги халқаро ҳамкорликни ривожлантиришга қаратилган.
Резолюция бўйича ўтказилган овоз беришда 167 давлат уни ёқлаб овоз берди. Ҳужжатга 61 мамлакат, жумладан Австрия, Германия, Хитой, Япония, Жанубий Корея, Бразилия ва Испания ҳаммуаллиф сифатида қўшилган.
Қайд этилишича, мазкур резолюциянинг қабул қилиниши Ўзбекистон томонидан илгари сурилган ташаббусларнинг халқаро майдонда қўллаб-қувватланаётганини ҳамда мамлакатнинг парламентлараро ҳамкорлик ва ижтимоий ривожланиш йўналишидаги саъй-ҳаракатларига берилган эътирофни акс эттиради.
