Ўзбекистонда белгиланган тезликни 80 км/соатдан оширганлик учун ҳайдовчилик ҳуқуқидан маҳрум қилиш таклиф этилди
Айрим қоидабузарликлар учун автомототранспорт воситасини 6 ойдан 1 йилгача вақтинча олиб қўйиш назарда тутилмоқда.
Ўзбекистонда йўл ҳаракати қоидаларини қўпол равишда бузган ҳайдовчиларга нисбатан автомототранспорт воситасини вақтинча олиб қўйишни янги маъмурий жазо чораси сифатида жорий этиш таклиф этилмоқда. Тегишли қонун лойиҳаси ЎзЛиДеП фракцияси йиғилишида муҳокама қилинди.
Партия матбуот хизматига кўра, лойиҳа йўл ҳаракати хавфсизлиги тизимини такомиллаштириш мақсадида амалдаги қонунчиликка ўзгартириш ва қўшимчалар киритишни назарда тутади.
Қонун лойиҳасига мувофиқ, Маъмурий жавобгарлик тўғрисидаги кодексга “автомототранспорт воситасини вақтинча олиб қўйиш” номли янги маъмурий жазо тури киритилиши таклиф этилган. Унга кўра, айрим қўпол қоидабузарликларни содир этган шахсларнинг автомобили ёки мототранспорт воситаси суд қарори билан 6 ойдан 1 йилгача муддатга жарима майдончасига жойлаштирилиши мумкин.
Лойиҳада, шунингдек, вояга етмаган шахсга транспорт воситасини бошқаришни топшириш, ноқонуний пойгаларда қатнашиш, белгиланган тезликни кескин ошириш ҳамда маст ҳолда транспорт бошқариш учун жавобгарликни кучайтириш кўзда тутилган.
Хусусан, тезликни белгиланган меъёрдан 80 км/соатдан ортиқ оширган ҳайдовчиларни транспорт воситасини бошқариш ҳуқуқидан маҳрум қилиш ва уларга 26,8 миллион сўмгача жарима қўллаш таклиф этилмоқда.
Бундан ташқари, вояга етмаган шахсга транспорт бошқаришни топшириш оғир оқибатларга сабаб бўлган ҳолларда жиноий жавобгарлик белгилаш, автомобиль пойгаларини эса фақат махсус ажратилган ҳудудларда хавфсизлик талабларига риоя этилган ҳолда спорт тадбири сифатида ўтказишга рухсат бериш назарда тутилган.
ЎзЛиДеП маълумотига кўра, таклиф этилаётган ўзгартиришлар йўлларда ҳаракат хавфсизлигини ошириш, йўл-транспорт ҳодисаларининг олдини олиш ҳамда фуқароларнинг ҳаёти ва соғлиғини ҳимоя қилишга қаратилган. Қонун лойиҳаси ҳозирда муҳокама босқичида.
