“Аллоҳ яратган ҳар бир мавжудотнинг қадри бор” — Саида Мирзиёева
Президент администрацияси раҳбари ҳайвонларга нисбатан шафқатсиз муносабатда бўлганларга жазо кучайтирилганини эслатиб ўтди.
Саида Мирзиёева ҳайвонларга нисбатан шафқатсиз муносабат учун жавобгарлик кучайтирилганини эслатиб, жамиятда зўравонликка муросасиз муносабатни шакллантириш муҳимлигини таъкидлади.
Президент администрацияси раҳбарининг қайд этишича, жорий йилнинг 28 июнидан бошлаб ҳайвонларга шафқатсиз муносабатда бўлган шахсларга нисбатан янада қатъий жазо чораларини назарда тутувчи қонунчилик нормалари кучга кирган.
Янги тартибга кўра, бундай ҳуқуқбузарликлар учун маъмурий жарималар икки баравар оширилган. Шунингдек, ҳуқуқбузарларга нисбатан 15 суткагача маъмурий қамоқ жазоси қўлланиши мумкин.
Бундан ташқари, ҳайвонларга нисбатан шафқатсизликни такрор содир этган шахслар жиноий жавобгарликка тортилиши ва озодликдан маҳрум этилиши ҳам назарда тутилган.
Саида Мирзиёева бундай қонунлар фақат айбдорларни жазолаш учун эмас, балки жамиятда устувор қадриятларни мустаҳкамлашга хизмат қилишини таъкидлаган.
Унинг фикрича, жамиятда хавфсиз ва соғлом муҳитни шакллантириш учун зўравонликнинг ҳар қандай кўринишига муросасиз муносабатда бўлиш зарур. Шунингдек, ҳар бир тирик мавжудотнинг қадри борлиги, уларга нисбатан меҳр-оқибат ва масъулият ҳиссини шакллантириш муҳимлиги қайд этилган.
Саида Мирзиёева бу борада ота-оналарнинг ўрни алоҳида эканини таъкидлаб, фарзандларга болаликдан ожизларга озор етказмаслик, кучни шафқатсизлик орқали намоён этиш нотўғри эканини сингдириш зарурлигини билдирган.
