Қашқадарёда эркак хотинини аёвсиз калтаклади
Ҳимоя ордери расмийлаштирилганига қарамай, эркак турмуш ўртоғига тан жароҳати етказган.
Қашқадарё вилояти Ички ишлар бошқармаси ижтимоий тармоқларда тарқалган ҳолат юзасидан расмий муносабат билдирди.
Маълум қилинишича, Қарши шаҳрининг «Чўлқувар» маҳалласида вақтинча яшаб келган эр-хотин ўртасида аввалдан мунтазам оилавий келишмовчиликлар кузатилган.
Шу сабабли маҳалла еттилиги томонидан оиладаги ҳуқуқбузарликларнинг олдини олиш мақсадида профилактик чоралар кўрилиб, аёлга нисбатан ҳимоя ордери расмийлаштирилган, шунингдек, улар истиқомат қилаётган хонадонга қўриқлаш сигнализацияси ўрнатилган.
Бироқ олиб борилган профилактик суҳбат ва огоҳлантиришларга қарамай, 26 июнь куни соат тахминан 23:00 да эр-хотин ўртасида яна жанжал келиб чиққан. Оқибатда эркак турмуш ўртоғини уриб, унга тан жароҳати етказган.
Мазкур ҳолат юзасидан Қарши шаҳар ИИБ Тергов бўлими томонидан Жиноят кодексининг 126-моддаси билан жиноят иши қўзғатилган. Ҳозирда ушбу иш бўйича тергов ҳаракатлари давом эттирилмоқда.
