Тошкентдаги 10 нафар туман ҳокимига нисбатан хизмат текшируви тайинланди

 

Тошкент шаҳар ҳокимининг 2026 йил 3 августдаги фармойиши билан Бектемир, Миробод, Мирзо Улуғбек, Олмазор, Сергели, Учтепа, Чилонзор, Шайхонтоҳур, Юнусобод ва Яшнобод туманлари ҳокимларига нисбатан хизмат текшируви тайинланди.

 

Қайд этилишича, текширув Ўзбекистон Республикаси Коррупцияга қарши курашиш агентлигининг 2026 йил 22 июлдаги тақдимномасида қайд этилган ҳолатларни ўрганиш мақсадида ташкил этилган.

 

Фармойишга мувофиқ, хизмат текширувини ўтказиш учун Тошкент шаҳар комиссияси тузилиб, унга тақдимномада келтирилган важларни холис ва сифатли ўрганиш, натижалари бўйича тегишли хулосаларни расмийлаштириш вазифаси юклатилган.

 

Шунингдек, зарурат туғилганда текширув жараёнига тегишли вазирлик ва идораларнинг мутахассислари ҳам жалб этилиши мумкинлиги қайд этилган. Мазкур фармойиш ижроси Тошкент шаҳар ҳокимининг комплаенс ва коррупцияга қарши ички назорат бўйича ўринбосари зиммасига юклатилган.