Араб ва мусулмон давлатлари Қуддусдаги муқаддас қадамжоларни ҳимоя қилиш режасини ишга туширди

Араб ва мусулмон давлатлари ташқи ишлар вазирлари босиб олинган Шарқий Қуддус ҳамда у ердаги исломий ва насроний муқаддас қадамжоларда Исроил томонидан содир этилаётган қонунбузарликларни ҳужжатлаштириш ва халқаро ҳамжамиятга етказиш учун доимий механизм ташкил этишга келишиб олди. Бу ҳақда Al Jazeera хабар берди.

 

Иорданияда бўлиб ўтган йиғилиш якунида қабул қилинган қўшма баёнотга кўра, Исроилнинг муқаддас қадамжолар ва ибодат қилувчиларга нисбатан ҳаракатларини ёритувчи махсус медиа платформа ишга туширилади. У орқали маълумотлар халқаро ташкилотлар ва жаҳон жамоатчилигига етказилади.

 

Йиғилишда Араб давлатлари лигаси Бош котиби Аҳмад Абул Ғайт, Араб вазирларининг Қуддус бўйича қўмитаси аъзолари, шунингдек, Туркия, Покистон, Индонезия ва Малайзия вакиллари иштирок этди. Улар халқаро ҳамжамиятни Қуддус ва унинг муқаддас қадамжоларида Исроил амалга ошираётган чораларни тўхтатиш учун зудлик билан амалий ҳаракатлар кўришга чақирди.

 

Қўшма баёнотда Исроилнинг Қуддуснинг араб, исломий ва насронийлик ўзига хослигини ҳамда унинг ҳуқуқий ва демографик мақомини ўзгартиришга қаратилган сиёсати қораланди. Исроилнинг Al-Ақсо масжиди ва бошқа диний масканлардаги ҳаракатлари тарихий ва ҳуқуқий мақомни бузишга қаратилган уриниш сифатида баҳоланди.

 

Шунингдек, иштирокчилар Қуддусдаги насроний муқаддас қадамжоларига нисбатан чекловлар, черковлар фаолиятига аралашув ва руҳонийларга қарши ҳужумларни ҳам қоралади.

 

Вазирлар сентябрь ойида БМТ Бош Ассамблеясининг Нью-Йоркдаги юқори даражадаги сессияси доирасида Ислом ҳамкорлик ташкилоти ва Араб давлатлари лигаси ташқи ишлар вазирларининг қўшма йиғилишини ўтказишни ҳам таклиф қилди. Унда Қуддус ва унинг муқаддас қадамжоларидаги вазият муҳокама қилинади.