Ўзбекистонда хавфли чиқиндиларини қайта ишлаш даражаси 20 фоизга етказилади
Президент хавфли чиқиндиларни бошқариш тизимини такомиллаштиришга оид қарорни имзолади.
Ўзбекистонда хавфли чиқиндиларни бошқариш самарадорлигини оширишга қаратилган Президент қарори қабул қилинди. Бу ҳақда Чиқиндиларни бошқариш ва циркуляр иқтисодиётни ривожлантириш агентлиги хабар берди.
Қайд этилишича, ҳужжат экологик хавфсизликни таъминлаш, саноат чиқиндиларини бошқариш тизимини такомиллаштириш ҳамда атроф-муҳитга салбий таъсирни камайтиришга қаратилган қатор янги чораларни назарда тутади.
Қарорга мувофиқ, 2030 йилгача тоғ-конь, металлургия, кимё саноати, нефть-газ ва электр энергетикаси корхоналарида ҳосил бўладиган радиоактив ҳамда I–IV хавфлилик синфига мансуб кимёвий хавфли чиқиндиларни қайта ишлаш даражаси 20 фоизга етказилади.
Шунингдек, қайта ишлаш имкони бўлмаган чиқиндиларни хавфсиз жойлаштириш тизимини тўлиқ жорий этиш, уларнинг давлат ҳисобини юритиш ва атроф-муҳитга салбий таъсирини камайтириш белгиланди.
2027 йил 1 январдан бошлаб хавфли чиқиндилар ҳосил қилувчи ташкилотлар экологик экспертиза хулосаси асосида йиллик чиқиндиларни бошқариш режаларини ишлаб чиқиши шарт бўлади. Улар чиқиндилар ҳажмини камайтириш, қайта ишлаш улушини ошириш ҳамда чиқиндиларни фақат тегишли рухсат ва инфратузилмага эга ихтисослашган ташкилотларга топшириши лозим.
Бундан ташқари, 2026 йил 1-октабрдан бошлаб ушбу корхоналар хавфли чиқиндилар бўйича ҳисоботларни Агентлик ахборот тизимига мунтазам киритиб боради. Мазкур талабларнинг бажарилиши устидан назоратни Экология ва иқлим ўзгариши миллий қўмитасининг Давлат экологик назорат инспекцияси (Экополиция) амалга оширади.
Қарор билан Чиқиндиларни бошқариш ва циркуляр иқтисодиётни ривожлантириш агентлиги ҳузурида Хавфли чиқиндиларни бошқариш дирекцияси ташкил этилади. Шунингдек, Республика радиоактив чиқиндиларни сақлаш маркази Агентлик тизимига ўтказилади ҳамда уран мероси объектларини экологик тиклаш бўйича ваколатли орган ва операторлар белгиланди.
Ҳужжатда рақамлаштириш масалаларига ҳам алоҳида эътибор қаратилган. 2027 йил 1 январга қадар махсус ахборот тизими ишга туширилади. У орқали I–III хавфлилик синфига мансуб чиқиндилар учун рақамли паспорт яратилади ва уларнинг ҳосил бўлишидан тортиб утилизация қилинишигача бўлган жараён реал вақт режимида мониторинг қилинади.
