Россияда ЙТҲ оқибатида икки нафар ўзбекистонлик ҳалок бўлди
Марҳумларнинг жасадлари суд-тиббий экспертизадан сўнг Ўзбекистонга қайтарилади.
Россиянинг Мордовия Республикасида ўзбекистонликлар иштирокида йўл-транспорт ҳодисаси содир бўлди. Ҳодиса оқибатида икки нафар Ўзбекистон фуқароси ҳалок бўлган, яна уч киши жароҳатланган.
Ўзбекистоннинг Қозон шаҳридаги Бош консулхонаси хабарига кўра, ЙТҲ 6 август куни Лямбир туманидаги Блохино қишлоғи яқинида М-5 “Урал” автомагистралининг 180-километрида юз берган.
Унда “MAZ” русумли юк автомобили ва Ўзбекистон давлат рақамига эга “Chevrolet Spark” автомобили тўқнашган.
Ҳодиса оқибатида 1996 йилда туғилган А.А.П. ва 1997 йилда туғилган Б.Ш.А. ҳалок бўлган. Яна 2002-, 1989- ва 2006 йилларда туғилган уч нафар Ўзбекистон фуқароси турли даражадаги тан жароҳатлари билан шифохонага ётқизилган.
Бош консулхона ҳолатни назоратга олган. Марҳумларнинг жасадларини суд-тиббий экспертиза ва бошқа зарур жараёнлардан сўнг Ўзбекистонга қайтариш ишлари Миграция агентлиги томонидан амалга оширилиши маълум қилинди.
Жароҳатланган фуқароларга зарур тиббий ёрдам кўрсатилган ва улар шифохонадан чиқарилган.
