Ўзбекистон Журналистлар уюшмаси қошида экологик клуб ташкил этиш таклиф қилинди
Уюшма қошидаги Журналист аёллар кенгашининг “Яшил иқтисодиёт ва аёллар: асраш масъулияти” мавзусида давра суҳбати ташкил этилди.
Ўзбекистон Журналистлар уюшмасида “Яшил иқтисодиёт ва аёллар: асраш масъулияти” мавзусида давра суҳбати бўлиб ўтди.
Унда журналистлар, жамоат фаоллари ва соҳа вакиллари иштирок этиб, долзарб масалалар юзасидан фикр алмашишди, экологик муаммоларни ёритишда журналистлар йўл қўяётган камчиликлар таҳлил қилинди. Шунингдек, тадбир давомида Уюшма қошида экологик йўналишдаги клуб ташкил этиш ташаббуси ҳам илгари сурилди.
Давра суҳбатида мутахассислар ва соҳа вакиллари экологик муаммоларни бартараф этишда ҳар бир фуқаронинг, айниқса, хотин-қизларнинг ўрни ва масъулияти алоҳида аҳамият касб этишини таъкидладилар. Қайд этилишича, экологик маданиятни шакллантириш оиладан бошланади. Кундалик турмушда сувни тежаш, электр энергиясидан оқилона фойдаланиш, чиқиндиларни саралаш ва тежамкорлик тамойилларига амал қилиш орқали атроф- асрашга муносиб ҳисса қўшиш мумкин.
Тадбир давомида рўзғорда тежамкорлик маданиятини қарор топтириш, сув ресурсларидан самарали фойдаланиш ҳамда экологик одатларни болаликдан сингдириш масалаларига алоҳида эътибор қаратилди.
Тадбир якунида экологик масъулиятни кучайтириш, хотин-қизларнинг экологик ташаббусларини қўллаб-қувватлаш ҳамда бу борада оммавий ахборот воситаларининг иштирокини кенгайтириш юзасидан қатор таклиф ва тавсиялар илгари сурилди.
