Беҳруз Каримов фаолиятини Швейцариянинг “Лугано” клубида давом эттиради
18 ёшли футболчи виза расмийлаштирилгач, янги жамоаси сафига қўшилади.
Ўзбекистон миллий терма жамоаси ва «Сурхон» клуби ҳимоячиси Беҳруз Каримов фаолиятини Швейцария Суперлигаси вакили «Лугано» клубида давом эттиради. Бу ҳақда Ўзбекистон Профессионал футбол лигаси (ЎзПФЛ) хабар берди.
18 ёшли футболчи Тошкент шаҳрида янги клуби учун тиббий кўрикдан ўтган. Шундан сўнг Каримов «Лугано» билан шартнома имзолаган.
Эндиликда футболчи Швейцарияда фаолият юритиши учун зарур визани олиши кутилмоқда. Тегишли ҳужжатлар расмийлаштирилгач, Каримов Швейцарияга йўл олади.
Швейцариянинг Сонтропиеде нашри ҳам «Лугано» 18 ёшли ўнг қанот ҳимоячисини «Сурхон» сафидан ўз таркибига қўшиб олганини хабар қилган. Манбага кўра, клуб трансферни ҳозирча расман эълон қилмаган, бироқ футболчи шартномани аллақачон имзолаган. «Лугано»нинг расмий баёноти яқин вақт ичида эълон қилиниши кутилмоқда.
Беҳруз Каримов футболчилик фаолиятини “Одил Жуниор” академиясида бошлаган. Ёш ҳимоячи 2026 йилги Жаҳон чемпионатида Ўзбекистон миллий терма жамоаси таркибида иштирок этиб, Португалия ва Колумбияга қарши учрашувларда майдонга тушган.
Каримовнинг «Лугано»га трансфери клубдаги ўнг қанот ҳимоячиси Маттиа Заноттининг келажаги борасидаги ноаниқликлар фонида амалга ошмоқда. Италиялик футболчининг бошқа клубга ўтиши кутилмоқда.
Айни пайтда «Лугано» Швейцария Суперлигасида икки турдан сўнг 6 очко жамғариб, турнир жадвалининг иккинчи поғонасидан жой олган. Мусобақа жадвалида “Ёунг Бойс” тўплар нисбати бўйича пешқадамлик қилмоқда.
